Не зважаючы на намаганні Нацбанка па правядзенні дэдаларызацыі, толькі 17,6% жыхароў краіны ніколі не пералічваюць свае зарплаты ў валюту. Такія дадзеныя атрымалі эксперты незалежнага інстытута сацыяльна-палітычных і эканамічных даследаванняў (НІСЭПД), зарэгістраванага ў Вільні.
Для 34,1% беларусаў па-ранейшаму актуальным застаецца менавіта даляравы эквівалент даходаў. Яшчэ 43,5% апытаных прызналіся, што часам надаюць увагу «зялёным» пры ацэнцы ўзроўню сваіх даходаў.
Паводле дадзеных НІСЭПД, чым старэйшы жыхар Беларусі, тым менш яго хвалююць суадносіны рубля і даляра. Напрыклад, толькі 11,9% грамадзян, старэйшых за 60 гадоў, пералічваюць свае даходы ў амерыканскую валюту. Пры гэтым, у катэгорыі «60+» амаль 40% апытаных заявілі, што наогул ніколі не прывязваюцца да курсу «зялёнага». Найбольшая доля тых, хто «залежыць» ад даляра, аказалася сярод беларусаў ва ўзросце ад 30 да 39 гадоў (45,8%).
Яшчэ адно пытанне, якое задалі сацыёлагі беларусам, датычылася прычын дэвальвацыі ў снежні-студзені.
Амаль палова апытаных (44,5%) лічыць, што падзенне курсу беларускага рубля звязана з паслабленнем расійскай валюты. Яшчэ 37,4% упэўненыя, што перадумовай 30-працэнтнай дэвальвацыі стала памылковая палітыка Нацбанка і ўрада. І амаль чвэрць беларусаў ўзяла віну на сябе: паводле іх меркавання, падзенне рубля звязана з тым, што насельніцтва актыўна скупляла валюту.
Трэба сказаць, тэзіс аб тым, што рост курсу даляра правакуюць самі жыхары Беларусі, нярэдка агучваўся ўладамі. «Хочаце абвалу — бегайце па абменніках. Гэта ўсё ў руках грамадзян нашай краіны. Ківаць на кіраўніцтва, на ўрад, на Нацыянальны банк сёння непрымальна», — заявіў Аляксандр Лукашэнка 18 снежня мінулага года.
Праз некаторы час кіраўніка дзяржавы дапоўніў тагачасны прэм'ер-міністр Міхаіл Мясніковіч: «За кастрычнік-лістапад бягучага года грамадзяне нашай краіны імпартавалі з Расійскай Федэрацыі 21500 аўтамабіляў. Па самых сціплых ацэнках, гэта каля $320 млн. Гэта даляры, якія вывезлі з Беларусі ў Расію… Гэта была выгадная здзелка для людзей. Гэта ў нейкай меры спарадзіла ажыятажны попыт на валюту».
Што тычыцца пытання аб магчымам паўтарэнні дэвальвацыі, то рэальнай гэтую пагрозу ў сакавіку лічылі 32,8% беларусаў, і толькі 12,9% былі ўпэўненыя, што падзенне валюты ў бліжэйшыя месяцы не здарыцца.
Каментары