Respublikanski ekałahičny forum sioleta ŭpieršyniu projdzie ŭ Minsku

CHIII Respublikanski ekałahičny forum sioleta ŭpieršyniu budzie pravodzicca ŭ Minsku, paviedamiła na pres-kanfierencyi 14 maja pieršy namieśnik ministra pryrodnych resursaŭ i achovy navakolnaha asiarodździa Ija Małkina. 

«Dvanaccać papiarednich forumaŭ pravodzilisia ŭ roznych rehijonach respubliki, u pieršuju čarhu heta byli abłasnyja i rajonnyja centry, pavodle vynikaŭ forumu my davodzili da žycharoŭ hetaha rehijona niejkija našy idei», — adznačyła jana. 

Praviadzieńnie forumu ŭ Minsku — «vialikaja adkaznaść», ličyć Małkina, tamu mierapryjemstvy, arhanizavanyja ŭ jaho miežach, «pavinny być bolš maštabnyja». 

Forum projdzie z 19 pa 22 maja, asnoŭnyja mierapryjemstvy, uklučajučy plenarnaje pasiadžeńnie, adbuducca 20 maja. Pavodle słoŭ Małkinaj, plenarnaje pasiadžeńnie forumu budzie pryśviečanaje temie ekałahizacyi ekanomiki krainy. «Kankretnyja jurydyčna značnyja rašeńni ŭ miežach plenarnaha pasiadžeńnia my nie płanujem prymać, ale asnoŭnaja meta hetaha kirunku zaklučajecca ŭ pryciahnieńni ŭ pieršuju čarhu ŭvahi kiraŭnikoŭ dziaržaŭnych orhanaŭ da prablem ekałahizacyi. My chočam pakazać, što ŭ Biełarusi sapraŭdy šmat robicca i na ŭzroŭni hramadskaści, i na ŭzroŭni peŭnych subjektaŭ haspadarańnia, ale časam heta maje razroźnieny charaktar», — adznačyła namieśnik ministra. Jana taksama zaklikała ŭziać udzieł u abmierkavańni pradstaŭnikoŭ biźniesu. 

U miežach forumu buduć pracavać siekcyi «Ustojlivaje raźvićcio i zialonaja ekanomika», «Vada», «Adukacyja ŭ intaresach ustojlivaha raźvićcia», «Hleby», projdzie kanfierencyja «Eka-horad», pryśviečanaja płanavańniu raźvićcia haradoŭ z ulikam ich upłyvu na navakolnaje asiarodździe, kanfierencyja pa bijaraznastajnaści, buduć arhanizavanyja sieminary i majstar-kłasy, padviedzienyja vyniki konkursu hrafici na ekałahičnuju tematyku, a taksama adbudziecca šerah vyjaznych mierapryjemstvaŭ. 

19—22 maja ŭ miežach forumu ŭpieršyniu projdzie vystava «Zialony dom», poŭnaściu pryśviečanaja ekałohii. Pavodle słoŭ dyrektara ŭnitarnaha pradpryjemstva «Bielinterekspa» Jaŭhiena Uviadzienskaha, u vystavie voźmuć udzieł pryblizna 50 pradpryjemstvaŭ, jakija pracujuć u śfiery alternatyŭnaj enierhietyki, pierapracoŭki adchodaŭ, enierhaźbierahalnych technałohij, technałohij ačystki pavietra i vady, vytvorčaści ekałahična čystaj pradukcyi i inšych. «My zadumali hetaje mierapryjemstva jak ekałahičny fiestyval, jaki moh by być cikavym dla ŭsich i ŭ toj ža čas paŭnavartasna aśviatlaŭ by najnoŭšyja raspracoŭki ŭ ekałohii», — adznačyŭ jon.

• 0
• 0
• 0
• 0
• 0
• 0
• 0
• 0