Navukoŭcy: rola sacsietak u revalucyjach pieraacenienaja
Suviaź sacsietak z revalucyjami moža być pramoj, advarotnaj ci nijakoj.
Śpiecyjalisty Łondanskaha haradskoha ŭniviersiteta apublikavali ŭ časopisie Journal of Communication daśledavańnie aktyŭnaści ŭ sacsietkach padčas akcyj pratestu. Suviaź akazałasia bolš składanaj, čym mierkavałasia raniej, raspaviadaje N+1.
Časam u sacsietkach stanovicca šumna da pratestaŭ, časam — pa ich vynikach. A časam aktyŭnaść u pratestach i aktyŭnaść u sacsietkach nie źviazanaja naohuł. Naŭrad ci Facebook i Twitter jość univiersalnaj «zbrojaj revalucyjaniera» pa ŭsim śviecie.
Daśledčyki praanalizavali ruch «Indignados» u Ispanii ŭ 2011 hodzie, ruch «Occupy» u ZŠA ŭ 2011-m i pratesty ŭ Brazilii ŭ 2013-m (ich prazvali «Vocatnaj revalucyjaj» — mnohija vychodzili na vulicy z vocatam, što dapamahaje źnizić nastupstvy ad ślozatačyvaha hazu). Aceńvalisia kolkaść zvajazanych z pratestami tvitaŭ i pastoŭ u Facebook, kolkaść pratestoŭcaŭ, kolkaść aryštaŭ i zvarotaŭ u lakarni z traŭmami.
Kab adsačyć suviaź, navukoŭcy šukali tak zvanuju zaležnaść pa Hrendžeru — kali ŭzory dźviuch časavych paśladoŭnaściej supadajuć, ale adna paśladoŭnaść adstaje ad druhoj pa časie, padziei možna pryniać za źviazanyja. Naprykład, kali kolkaść mitynhoŭcaŭ padskočyła ŭdzień, a zranku naziraŭsia skačok kolkaści tvitaŭ, hetyja padziei mohuć być źviazanyja.
U ZŠA i Ispanii pa kolkaści tvitaŭ možna było pradkazać pratestnuju aktyŭnaść za dzień da jaje — tam Twitter vykarystoŭvaŭsia dla kaardynacyi. U Ispanii pasty ŭ Facebook pastupova množylisia da mitynhu i značna aktyvizavalisia padčas fizičnaha ŭdziełu ŭ akcyjach pratestu. U ZŠA ŭ dadatak da taho była suviaź Facebook-aktyŭnaści ź incydentami z udziełam palicyi.
Ale ŭ Brazilii nie nazirałasia praktyčna nijakoj suviazi — chiba kali niechta byŭ paranieny ci kali akcyi skončvalisia masavymi aryštami, sacsietki ažyŭlalisia.
Sacsietki naŭrad ci majuć klučavuju rolu ŭ pratestach, robiać vysnovu navukoŭcy. Mnohaje va ŭpłyvie sacsietak na revalucyi, tuju ž «Arabskuju viasnu», zaležyć ad praniknieńnia internetu i ŭpłyvu TV, kulturnych i hieahrafičnych asablivaściej.
Čytajcie taksama: Pa statystycy mabilnych apierataraŭ navučylisia pradkazvać masavyja biesparadki
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ5
Kamientary