12-hadovy Stas, jaki straciŭ ruku z-za hipsu, atrymlivaje 1,1 młn piensii
A ŭrač, jakoha vinavaciać u trahiedyi, praciahvaje pracavać u balnicy, bo zamianić jaho niama kim.
Bolš za paŭhoda prajšło z taho času, jak stała viadoma pra kryminalnuju spravu, raspačatuju z-za amputavanaj ŭ dzicionka ruki. Da biady davioŭ niedahlad z boku ŭračoŭ.
«Rasśledavańnie praciahvajecca. Jak tolki niejkaje pracesualnaje rašeńnie budzie pryniata, my paviedamim pra heta», — raskazvaje apošniuju aktualnuju infarmacyju Ina Harbačova, aficyjny pradstaŭnik upraŭleńnia Śledčaha kamitetu pa Viciebsku.
Nahadajem, što trahiedyja zdaryłasia ŭ Dubrovienskim rajonie. 11-hadovy Stas Mušatenka złamaŭ ruku ŭ dziciačym letniku. Hips, jaki akazaŭsia zanadta tuhim, nakłali ŭ Oršy. I adrazu ž adpravili traŭmavanaha chłopčyka dadomu ŭ ahraharadok Jakubava. Sprava była pierad vychadnymi. Ruka baleła tak mocna, što baćki vyklikali Stasu «chutkuju». Miedyki pryjechali, ale ad baćkoŭ admachnulisia, maŭlaŭ, heta pierałom i tak pavinna być. Paśla vychadnych u paniadziełak chłopčyka, ruka jakoha pasinieła, pavieźli ŭ Dubrovienskuju rajbalnicu. I tam zdymać hips nie stali. Toje ž samaje paŭtaryłasia ŭ aŭtorak. A ŭ sieradu za žyćcio chłopčyka ŭžo zmahalisia ŭ Viciebskaj abłasnoj balnicy. Dobra, što ŭratavali. Ale ruku z-za hanhreny daviałosia amputavać.
Mama Stasa dahetul nie viedaje, kali budzie sud. Śviatłana Michajłaŭna z hutarak sa śledčym zrazumieła, što zroblenyja ekśpiertyzy śviedčać pra chałatnaść z boku ŭračoŭ. A kankretna — chirurha z dubrovienskaj rajbalnicy i miedykaŭ z Oršy, jakija nasupierak instrukcyjam adpravili Stasa dadomu. Ale jakaja budzie kančatkovaja rezalucyja śledčaha, nie viedaje nichto.
«Stas adčuvaje siabie narmalna. Pratez zrabili. Ale jamu spoŭniłasia 12 hod, treba jechać pa novy pratez», — uzdychaje Śviatłana Michajłaŭna.
Piensija pa invalidnaści, jakuju vypłačvajuć Stasu, składaje 1 miljon 140 tysiač rubloŭ na miesiac. Bolš nijakaj dapamohi ad dziaržavy siamja nie atrymlivaje.
Raniej Jeŭraradyjo pahutaryła z tym samym chirurham Juryjem K. z dubrovienskaj balnicy. Miedyk pryznavaŭ svaju vinavataść u tym, što, na jaho dumku, pierabłytaŭ sindrom zdušeńnia sa zvyčajnym aciokam i heta mahło davieści da hibieli chłopčyka. Ale ŭrač ćviorda pierakanany, što ruka Stasa zahinuła ŭžo na nastupny dzień paśla nakładańnia tuhoha hipsu. Juryj K. byŭ u śledčaha čatyry razy i pakul nie viedaje, jak vyrašycca jaho los. Ličyć, što jaho mohuć jak apraŭdać, tak i abvinavacić. Tym časam jon praciahvaje pracavać na pasadzie chirurha u toj ža balnicy.
«Ja ŭvohule adzin zastaŭsia. Druhi chirurh u nas pamior. Zamianić mianie asabliva niama kamu. I na paŭstaŭki ŭ jakaści traŭmatołaha dapamahaje hałoŭurač», — apaviadaje Juryj K.
Pry hetym miedyk adznačaje, što lačeńnie traŭm, ź jakimi jon siońnia najčaściej sutykajecca, heta nie jaho kaniok. Juryj K. usio žyćcio zajmaŭsia chirurhijaj žyvatoŭ — apiendycytami i inšymi zachvorvańniami takoha kštałtu.
Kali letaś u śniežni Alaksandr Łukašenka daviedaŭsia pra historyju Stasa Mušatenki, to padčas sustrečy ź ministram achovy zdaroŭja Vasilom Žarko prapanavaŭ tamu nie tolki chvalicca pośpiechami, ale i źviarnuć uvahu na biestałkovaść niekatorych padnačalenych. Žarko pakorliva kivaŭ hałavoj i staranna niešta zanatoŭvaŭ.
Kamientary