Śledčy kamitet praciahvaje rasśledavańnie i vyśviatleńnie ŭsich abstavin kryminalnaj spravy, źviazanaj z zabojstvami hramadzian u metach zavałodańnia hrašyma ad prodažaŭ nieruchomaści ŭ Mahilovie, havorycca ŭ paviedamleńni SK ad imia kiraŭnika Śledčaha kamiteta Valancina Šajeva.
U chodzie śledstva asablivaja ŭvaha nadajecca vyśviatleńniu pryčyn i ŭmovaŭ, jakija sadziejničali ŭčynieńniu hetych złačynstvaŭ, a taksama vyjaŭleńniu mahčymych parušeńniaŭ z boku słužbovych asobaŭ roznych arhanizacyj i viedamstvaŭ. Vyvučajucca prablemy narmatyŭnaha rehulavańnia majomasnych i žyllovych pravaadnosin u metach ustanaŭleńnia mahčymych prabiełaŭ u zakanadaŭstvie. Užo ŭ pieršyja dni rasśledavańnia Śledčym kamitetam była vyjaŭlena adsutnaść naležnaha kantrolu i ŭliku pachavańniaŭ na mohiłkach, adznačajecca ŭ paviedamleńni.
Stvoranaja śledčaja hrupa pa kryminalnaj spravie ab zabojstvach ciapier aktyŭna pracuje nad ustalavańniem ŭsich abstavinaŭ dziejnaści abvinavačanych. Śledstva paetapna adnaviła schiemy ździajśnieńnia złačynstvaŭ, uklučajučy drobnyja detali, a taksama sposaby, matyvy, nakiravanaść namieru abvinavačanych.
U jakaści mierkavanych achviaraŭ złačynstva, tak zvanyja «čornyja ryełtary», vybirali adzinokich asob sacyjalna nieabaronienaj katehoryi nasielnictva. Paciarpiełyja ŭ bolšaści vypadkaŭ złoŭžyvali śpirtnymi napojami i mieli zapazyčanaści pa kamunalnych płaciažach.
Zatym adbyvałasia znajomstva ryełtaraŭ z paciarpiełym. Sposab vybiraŭsia ŭ zaležnaści ad kožnaj kankretnaj situacyi, ale byŭ u dvuch varyjantach: ci pad vyhladam maładoj siamiejnaj pary, abo ŭ vobrazie sudovaha vykanaŭcy, jaki pryjšoŭ spahaniać daŭhi pa kamunalnych pasłuhach.
Sprabujučy usimi mahčymymi sposabami paŭpłyvać na vybranuju achviaru, abvinavačanyja schilali kožnaha z paciarpiełych da ździajśnieńnia ździełki pa prodažy kvatery. Tut u chod išli roznyja sposaby: prapanoŭvaŭsia ałkahol, pradukty, hrošy. Akramia taho, abvinavačanyja abiacali dapamohu ŭ nabyćci bolš tannaha žylla paśla prodažu kvater. Dalej malavalisia pryhožyja pierśpiektyvy žyćcia paciarpiełych za košt roźnicy ad vyručanych pry prodažy kvater hrašovych srodkaŭ.
Kab kančatkova raźviejać sumnievy ŭ praŭdzivaści svaich namieraŭ, abvinavačanyja brali ŭ arendu na sutki jakuju-niebudź kvateru ŭ Mahilovie, pryvozili tudy paciarpiełaha i demanstravali varyjant budučaha žylla.
Pry hetym adbyvałasia insceniroŭka: u roli haspadara zdymnaj kvatery vystupaŭ chto-niebudź z złamyśnikaŭ, i, kali paciarpieły davaŭ svaju zhodu na nabyćcio dadzienaj kvatery, abvinavačanyja demanstratyŭna pieradavali zmoŭščyku zakład za «kuplu» kvatery. Z paciarpiełaha ŭ svaju čarhu brali raśpisku ŭ tym, što jon abaviazvajecca viarnuć sumu zakładu.
U dalejšym «čornyja ryełtary» dapamahali patencyjnaj achviary z afarmleńniem i zboram usich nieabchodnych dakumientaŭ dla prodažu svajho žylla, pieradavali hrošy na pahašeńnie kamunalnaj zapazyčanaści. Asablivaściu źjaŭlałasia toje, što administracyjnyja pracedury i płaciažy ździajśnialisia paciarpiełymi asabista, a abvinavačanyja ŭsialak chavali svoj udzieł u supravadžeńni pracedury adčužeńnia žylla.
Kali ŭvieś nieabchodny dla prodažu pakiet dakumientaŭ byŭ sabrany, na imia paciarpiełaha rehistravalisia dva telefonnyja numary i nabyvalisia dva niedarahija mabilnyja telefony. Adzin telefon zastavaŭsia ŭ paciarpiełaha, a druhi — u abvinavačanych. Tak kanśpiravałasia suviaź budučych achviar i złamyśnikaŭ.
Pierad ździajśnieńniem kožnaj z ździełak, paciarpiełych rehistravali na terytoryi Minskaha rajona.
Nastupny etap byŭ infarmacyjnym: raźmiaščalisia abjavy ab prodažy kvatery ŭ hazietach i na rekłamnych sajtach. U jakaści kantaktnaha numaru telefona raźmiaščaŭsia telefon «čornych ryełtaraŭ», nabyty napiaredadni. Dla patencyjnych pakupnikoŭ pakazvałasia asnoŭnaja ŭmova ździełki: raźlik najaŭnymi hrašyma.
Dalej adbyvałasia pracedura afarmleńnia prodažu kvatery va ŭstanoŭlenym zakonam paradku. Paśla realizacyi ŭsioj vyšejpakazanaj schiemy paciarpieły pradavaŭ svaju kvateru.
Zatym «čornyja ryełtary» pad roznymi padstavami, u tym liku śviatkavańnia paśpiachovaha zaviaršeńnia ździełki, zaprašali achviar u biaźludnyja miescy, dzie paśla zabivali.
Kab padkreślić cynizm i žorstkaść pryciahnutych pa spravie abvinavačanych, mahiły jany kapali zahadzia dla jašče žyvych ludziej: napiaredadni ździełki albo za niekalki dzion da jaje ździajśnieńnia, abvinavačanyja vybirali miesca na mohiłkach, dzie płanavali pachavać paciarpiełaha paśla zabojstva. Dla hetaha adšukvalisia asoby, jakija za nievialikaje ŭznaharodžańnie kapali mahiły pad padstavaj pachavańnia «pamierłaha svajaka».
Raniej Śledčy kamitet paviedamlaŭ pra toje, što śledstva vyjaviła šeść faktaŭ zabojstvaŭ hramadzian i adnu padrychtoŭku da zabojstva, jakoje nie było daviedziena da kanca pa niezaležnych ad abvinavačanych abstavinach. Ciapier ustanoŭlena jašče dva fakty padrychtoŭki da zabojstvaŭ. Dla dźviuch budučych achviar užo byli vykapanyja mahiły na mohiłkach.
Ciapier čytajuć
23‑hadovy achoŭnik z Astraŭca zahinuŭ za Rasiju na vajnie. Pavajavaŭ jon, vidać, kala miesiaca2
Kamientary