U armii «DNR» vajuje były milicyjanier-zabojca ź Minska?
Na kanale «Novostnoj Donbass» YouTube źjaviłasia intervju z radavym 1-j Słavianskaj bryhady armii samaabvieščanaj «Danieckaj narodnaj respubliki». Čałaviek u vajskovaj formie śćviardžaje, što jon u minułym słužyŭ apieratyŭnikam u minskaj milicyi i zavuć jaho Alaksiej Rusiajeŭ.
Chto jon na samaj spravie i pra što zmaŭčaŭ?
Kab atrymać cikavuju dla nas infarmacyju, karespandentu Naviny.by daviałosia padniać na nohi znajomych vieteranaŭ minskaha kryminalnaha vyšuku. Bo čałavieku na videa nie mienš za piaćdziesiat hadoŭ. I voś što ŭdałosia vyśvietlić.
U pačatku 1990-ch ŭ orhanach unutranych spraŭ stalicy, dakładniej, u Pieršamajskim RAUS, sapraŭdy słužyŭ apieratyŭny ŭpaŭnažavany adździeła kryminalnaha vyšuku lejtenant Alaksiej Rusiajeŭ. Za plačyma ŭ jaho była armija i Viciebski vieterynarny instytut. Čas tady było niaprosty, ź milicyi zvalnialisia masava, a na słužbu prymali praktyčna ŭsich achvotnych.
Rusiajeŭ prasłužyŭ nie bolš za dva hady. U 1993 ci 1994 hodzie jon byŭ aryštavany i asudžany na 15 hadoŭ za zabojstva armianskaha pradprymalnika i šerah inšych złačynstvaŭ, u liku jakich i źbićcio zatrymanych. Zrazumieła, što z pazbaŭleńniem zvańnia aficera milicyi.
Razam ź im termin atrymaŭ jaho rodny brat i jašče adzin były supracoŭnik milicyi. Kali Rusiajeŭ vyzvaliŭsia i čym zajmaŭsia, vyśvietlić nie ŭdałosia.
U intervju na videa čałaviek, jaki nazvaŭsia byłym minskim apieratyŭnikam, śćviardžaje, što jaho pazyŭny Sierb, bo jon vajavaŭ dobraachvotnikam u Juhasłavii. Na dumku adnaho ź vieteranaŭ minskaha vyšuku, heta małavierahodna.
«Jak by našy ŭ kadry ŭ tyja hady nie pracavali, kab zapoŭnić vakansii, ale takuju biełuju plamu ŭ bijahrafii jany b nie ryzyknuli prapuścić, kožnaha kandydata praviarali pilna», — zaŭvažyŭ surazmoŭca Naviny.by.
Čałaviek na videa paviedamiŭ, što jon pryjechaŭ na Danbas ŭ žniŭni minułaha hoda. Byŭ piać razoŭ paranieny i zhubiŭ ruku padčas boju ŭ rajonie pasiołka Spartak. Ciapier jon adnaŭlajecca ŭ balnicy i maje namier viarnucca ŭ svajo padraździaleńnie.
Kali radavy armii DNR i čałaviek, asudžany ŭ «lichich 90-ch» za zabojstva ŭ Minsku, sapraŭdy adzin i toj ža čałaviek, to kamientary, jak havorycca, zališnija.
Da miesca zaŭvažyć, što ŭdzieł hramadzian Biełarusi va ŭzbrojenym kanflikcie va Ŭkrainie za luby z bakoŭ — kryminalna karanaje dziejańnie. Kali Alaksiej Rusiajeŭ vierniecca na radzimu, to jon moža być pryciahnuty da adkaznaści pa art. 133 KK RB («najomnictva»).
Udzieł na terytoryi zamiežnaj dziaržavy va ŭzbrojenych kanfliktach, vajennych dziejańniach asoby, jakaja nie ŭvachodzić u skład uzbrojenych sił vajujučych bakoŭ, z metaj atrymańnia materyjalnaha ŭznaharodžańnia biez ŭpaŭnavažańnia dziaržavy, hramadzianinam jakoj jana źjaŭlajecca, karajecca pazbaŭleńniem voli ad 3 da 7 hadoŭ z kanfiskacyjaj majomaści abo biez kanfiskacyi.
Kamientary