Praz subotniki i «darmajedaŭ» Biełaruś trapiła ŭ lik najhoršych krain pa handli ludźmi i ekspłuatacyi pracy
Rasija, Paŭnočnaja Kareja, Vieniesueła, Iran, Livija, Siryja, Zimbabve… i ciapier my.
Dziarždepartamient ZŠA apublikavaŭ (PDF) čarhovy dakład ab ekspłuatacyi pracy i handli ludźmi ŭ roznych krainach śvietu. U im Biełaruś pieramiaściłasia z «druhoj hrupy pad nahladam» u treciuju, najhoršuju ŭ śviecie.
Z 2011 hoda biełarusy stanoviacca achviarami ekspłuatacyi pracy čaściej nie za miažoj, a na radzimie, kažuć u dakładzie. Da taho ž, kraina ŭ halinie baraćby z handlem ludźmi «nie adpaviadaje minimalnym standartam i nie robić značnych vysiłkaŭ pa vypraŭleńni hetaha».
Adznačajucca «spansavanyja dziaržavaj» prymusovyja pracy na subotnikach, «padatak z darmajedaŭ», adsyłka vučniaŭ i studentaŭ na sielhasraboty dy vajskoŭcaŭ na nievajskovyja zadačy, prymusovyja pracy padčas «lekavańnia» ałkahalizmu i narkamanii, umovy prymusovaj pracy ŭ turmach, «pryhonny» dekret pa drevaapracoŭčaj pramysłovaści 2012 hoda dy mnohija inšyja niedapuščalnyja pa mižnarodnych standartach źjavy. Adznačajucca i niedastatkovyja, «dekłaratyŭnyja» vysiłki pa baraćbie z handlem ludźmi dy adsutnaść pravavoha miechanizmu abarony jaho achviar.
Raniej Biełaruś mieła na mapie rudy koler — hrupa 2, ale pad pilnym nazirańniem. To značyć, jana ŭvachodziła ŭ lik krain z surjoznymi prablemami z prymusovaj pracaj i handlem ludźmi dy pahrozaj pierajści ŭ lik najhoršych krain śvietu. U hetuju hrupu, «pad nazirańniem», sioleta ŭvachodziać Ukraina, Bałharyja, Kitaj, Jehipiet, Saudaŭskaja Aravija, Kuba, Uźbiekistan, Turkmienistan, Pakistan, pałova Afryki i inšyja.
Troški lepšaja situacyja ŭ «žoŭtych» krain, hrupy 2, u lik jakich uvachodziać bałtyjskija susiedzi Biełarusi, mnohija krainy Paŭdniovaj Jeŭropy, «ščaśliviejšaja» pałova Afryki, amal usia Centralnaja i Paŭdniovaja Amieryka, amal usia Azija.
Ciapier Biełaruś afarbavanaja ŭ čyrvony koler — my ŭvajšli ŭ lik 23 najhoršych u śviecie krain pa prymusovaj pracy i handlu ludźmi. My poruč z Rasijaj, Paŭnočnaj Karejaj, Tajłandam, Vieniesuełaj, Iranam, Livijaj, Siryjaj, Ałžyram, Jemienam, Zimbabve, Paŭdniovym Sudanam, Centralnaafrykanskaj Respublikaj i inšymi.
Prezident ZŠA maje prava ŭvieści suprać «čyrvonych» krain sankcyi, nie źviazanyja z humanitarnaj i handlovaj supracaj.
Čytajcie taksama:
Biełaruś nie ŭvajšła ŭ sotniu miralubivych krain
Mapa, jakaja raduje tym, što Biełaruś na joj «biełaja plama»
Kamientary