Uradžaj zbožžavych sioleta čakajecca na ŭzroŭni 8,7-8,8 młn ton u śvirnavaj vazie suprać 9,1 młn ton letaś. «Ale chleb u našaj krainie jość. I košty na našu pradukcyju nie padymucca», — zajaviŭ na pres-kanfierencyi ŭ sieradu ministr sielskaj haspadarki i charčavańnia Leanid Zajac.
U ciapierašni čas prybranyja zbožžavyja na płoščy 1,108 młn ha (49,3% ad ahulnaj płoščy). Na palach pracuje bolš za 10 tysiač zbožžaŭboračnych kambajnaŭ. Vałavy zbor skłaŭ 3,999 młn ton. Dziaržzakaz vykanany na 34%. Zaviaršyć uborku zbožžavych płanujecca na praciahu 10-12 dzion.
Siaredniaja ŭradžajnaść pa krainie skłała 36,1 centniera z hiektara. U asobnych haspadarkach uradžajnaść značna vyšej. Da prykładu, u ahrakambinacie «Snoŭ» jana składaje 102,1 centniera z hiektara.
«Biahučy hod svaimi ŭmovami nadvorja ŭnios peŭnyja karektyvy ŭ farmiravańnie ŭradžaju našych paŭdniovych abłaściej i paŭdniovych rajonaŭ inšych abłaściej», — adznačyŭ ministr. Homielskaja vobłaść, Salihorski, Słucki, Lubanski, Staradarožski, Babrujski rajony adčuvajuć niedabor zbožža z-za adsutnaści atmaśfiernaj i hlebavaj vilhaci.
Leanid Zajac adznačyŭ, što sabranych 8,7-8,8 młn ton dastatkova, kab zabiaśpiečyć krainu chlebam u poŭnym abjomie. «Ź minułaha hoda ŭ nas kala 1,5 młn ton zastałosia zbožža ŭ zasiekach», — dadaŭ jon. Heta pierachodziačy furažny zapas i kala 500 tysiač ton charčovaha zbožža.
«Sioleta my majem namier sfarmavać paŭtarahadovy zapas mienavita charčovaha zbožža. Takija zapasy nikomu nie pieraškodziać», — adznačyŭ ministr.
Bolš za toje, Biełaruś nie płanuje skaračać ekspart muki, jaki letaś dasiahnuŭ 50 tysiač ton. Ciapier aktyŭna pastupajuć u Biełaruś zajaŭki z Maskvy i Sankt-Pieciarburha na žytniuju muku.
Uradžaj bulby ŭ hetym čakajecca na ŭzroŭni minułaha hoda — 1,1 młn tonn, a mahčyma, i vyšej.
Pry hetym Zajac upeŭnieny, što rostu cen na sielhaspradukcyju z-za mahčymaha źnižeńnia ŭradžaju nie čakajecca. «U nas niama namieru śpiekulavać na rynku dla ŭźniaćcia cen», — zapeŭniŭ ministr.
Kamientary