Aktyvistka kampanii «Havary praŭdu» Taćciana Karatkievič, jakaja pretenduje na pasadu prezidenta, nie suprać padać sabranyja ŭ padtrymku jaje vyłučeńnia podpisy, ale ličyć, što zaraz jaje kamandzie lepš skancentravacca na vybarčaj kampanii.
«My nie suprać pravierki, ale zaraz nam jość čym zajmacca, — zajaviła jana. — Važna zrazumieć, što budzie vynikam pravierki? Što budzie dalej? Jany pierakanajucca, što podpisy pravilnyja, heta ž ničoha nie źmienić u ich palitycy, žyćci».
Karatkievič upeŭnienaja, što jaje inicyjatyŭnaja hrupa sabrała nieabchodnuju kolkaść podpisaŭ, što «jany absalutna sapraŭdnyja». «Ale dla mianie ciapier važna skancentravacca na budučyni kampanii: my rychtujemsia da rehistracyi, ahitacyi, nazirańnia. Mnie zdajecca, siońnia važna ŭsim palityčnym subjektam hramadzianskaj supolnaści aktyvizavać svaju pracu ź ludźmi, jak heta rabili my na etapie zboru podpisaŭ. Prezidenckaja kampanija — važny etap žyćcia hramadstva, my pavinny ŭsie razam pracavać ź ludźmi», — skazała jana.
Nahadajem, z prapanovaj pravieści niezaležnuju ekśpiertyzu sapraŭdnaści podpisaŭ za vyłučeńnie kandydataŭ u prezidenty jašče 14 lipienia vystupiŭ ruch «Za Svabodu».
24 žniŭnia «Za Svabodu» adrasavaŭ hetuju prapanovu piersanalna aktyvistcy kampanii «Havary praŭdu» Taćcianie Karatkievič — adzinaj, čyja inicyjatyŭnaja hrupa abviaściła pra zbor nieabchodnych 100 tysiač podpisaŭ. Karatkievič zastajecca apošnim demakratyčnym pradstaŭnikom u vybarčaj kampanii i ŭ vypadku rehistracyi kandydatam u prezidenty stanie «hołasam usich demakratyčnych sił». Uličvajučy, što «ŭ publičnaj prastory čutnyja nastojlivyja hałasy niedavieru adnosna realnaha liku podpisaŭ, sabranych inicyjatyŭnaj hrupaj Karatkievič», ruch «Za Svabodu» ličyć, što niezaležnaja hramadskaja pravierka sabranych podpisaŭ stała b «krokam maralnaj palityki i sposabam palapšeńnia imidžu demakratyčnych sił».
26 žniŭnia ideju stvareńnia hramadskaj kamisii pa praviercy podpisaŭ u padtrymku vyłučeńnia pretendentaŭ na pasadu prezidenta padtrymaŭ arhkamitet partyi «Biełaruskaja chryścijanskaja demakratyja».
Kamientary