Rasijski siervis prapanuje biełarusam falšyvyja daviedki, kab nie płacić «zbor za darmajedstva»
Viasnoj prezidentam Biełarusi byŭ pryniaty tak zvany «dekret ab darmajedach»: maŭlaŭ, nie chočaš pracavać na karyść rodnaj krainy – zapłaci 20 bazavych u biudžet. Adnak amatary zarabić na biełaruskich darmajedach znajšlisia i ŭ Rasii.
U internecie pačaŭ pracu sajt, jaki zajmajecca handlem fejkavych daviedak, jakija śviedčać, što čałaviek peŭny čas adpracavaŭ u rasijskaj kampanii. A heta vyzvalaje jaho ad vypłaty zboru «za darmajedstva».
«Dla paćvierdžańnia taho, što hramadzianin bolš za paŭhoda znachodziŭsia za miežami Respubliki Biełaruś, siońnia nacyjanalnyja padatkovyja orhany patrabujuć pradstaŭleńnia luboha piśmovaha dokazu, u tym liku, i daviedki ź miesca pracy hramadzianina Respubliki Biełaruś, u jakoj budzie paćvierdžana jaho pracoŭnaja dziejnaść za miežami krainy ŭ pieryjad bolš za paŭhoda, — paviedamlajuć vytvorcy «daviedak». — My prapanujem vam nabyć dadzienuju daviedku ŭ našaj kampanii (košt 2000 rasijskich rubloŭ z ulikam dastaŭki paštovym adpraŭleńniem u luby nasieleny punkt Respubliki Biełaruś). Dakumient, jaki źmiaščaje piačatku arhanizacyi, dapamoža vam paćvierdzić ŭ rehijanalnym pradstaŭnictvie padatkovaj słužby fakt vašaj pracoŭnaj dziejnaści za miažoj u toj ci inšy pieryjad času i paźbiehnuć vypłaty abaviazkovaha zboru ŭ pamiery 20 bazavych vieličyń.
Bolš za toje, na «daviedcy dla darmajedaŭ», jakuju vy atrymajecie ad nas, budzie paznačany kantaktny maskoŭski telefonny numar i elektronny adras našaj kampanii ŭ Rasii. Kali vaš rehijanalny padatkovy inśpiektar zachoča atrymać paćvierdžańnie vašaj pracoŭnaj dziejnaści ŭ kampanii pa dadzienych kantaktach, jamu budzie nakiravana paćviardžeńnie».
Pry hetym budučym uładalnikam «daviedak» navat prapanujecca paznačyć blizkija im śfiery dziejnaści.
Darečy, 2000 rasijskich rubloŭ — prykładna 550.000 biełaruskich — heta sapraŭdy mienš, čym pryjdziecca zapłacić u biełaruski biudžet biespracoŭnamu «darmajedu». Zbor na siońnia składaje 3,6 miljona biełaruskich rubloŭ.
Źviazacca z tymi, chto handluje daviedkami, prosta — dastatkova pazvanić pa telefonie, jaki paznačany na sajcie.
«U nas aficyjnaja firma, tavarystva z abmiežavanaj adkaznaściu, jakoje zajmajecca paralelna inšymi prajektami. Daviedka robicca ciaham dnia. Ale «Pošta Rasii» dastaŭlaje ich ŭ Biełaruś u termin ad 14 da 21 dnia. Kali treba chutčej, pryjdziecca dapłacić, — tłumačyć małady čałaviek, jaki ŭziaŭ słuchaŭku. — Usie kampanii i firmy, jakija paznačajucca ŭ daviedkach realnyja. Palicyi my nie baimsia, prablemaŭ z zakonam i pytańniaŭ nie ŭźnikała i nie ŭźniknie. Našy padatkovyja inśpiektary ŭpeŭnivajuć, što Biełaruś i Rasija abmieńvajucca bazami, ale pa fakcie nifiha tak nie adbyvajecca. Tam nichto navat nie praviaraje hetyja dadzienyja».
Pryčym, dakładna nieviadoma, jakaja adkaznaść pahražaje «darmajedu z daviedkaj».
Kali vyśvietlicca, što taja daviedka niesapraŭdnaja, jon pavinien budzie zapłacić zbor, paviedamiŭ Siarhiej Škut, načalnik adździeła infarmacyjna-tłumačalnaj pracy Ministerstva pa padatkach i zborach. Ci buduć pieradadzienyja u MUS źviestki ab hramadzianinie, jaki prynios takuju daviedku, Škut kankretna nie skazaŭ.
«Zrazumiejcie, ja nie mahu raskryvać usie detali i niuansy našaj pracy. Ale biez uvahi padobny vypadak nie zastaniecca», — paviedamiŭ Siarhiej Škut.
Kamientary