Viarchoŭnaja rada Ukrainy ŭchvaliła papraŭki da Pracoŭnaha kodeksa, jakija zabaraniajuć usie vidy dyskryminacyi na pracoŭnym miescy — u tym liku dyskryminacyju pa prykmiecie seksualnaj aryjentacyi.
U padtrymku papravak prahałasavali 234 parłamientaryi pry nieabchodnym minimumie ŭ 226. Raniej Rada niekalki razoŭ biespaśpiachova sprabavała pryniać hetyja papraŭki. Tak, u minuły aŭtorak deputaty ŭžo hałasavali pa zakonaprajekcie, adnak jon nie nabraŭ minimumu hałasoŭ.
Papraŭki ŭ Pracoŭny kodeks — heta apošni z 10 zakonaprajektaŭ, pryniaćcie jakich Jeŭrasajuz nazyvaje umovaj dla razhladu mahčymaści ŭvieści biaźvizavy režym z Ukrainaj.
Novyja papraŭki zabaraniajuć, u pryvatnaści, dyskryminacyju pa prykmiecie koleru skury, relihijnych pierakanańniaŭ, najaŭnaści zachvorvańnia VIČ\ŚNID i seksualnaj aryjentacyi.
Najaŭnaść punkta ab seksualnaj aryjentacyi vyklikała ŭ mnohich deputataŭ Rady aściarohi, što hetyja papraŭki stanuć krokam da lehalizacyi adnapołych šlubaŭ va Ukrainie. Užo paśla hałasavańnia śpikier Rady Uładzimir Hrojsman zrabiŭ admysłovuju zajavu.
«Ja chaču jašče raz padkreślić, što asnoŭnymi kaštoŭnaściami luboj krainy źjaŭlajecca čałaviek i jaho pravy. My vystupajem za siamiejnyja kaštoŭnaści, i ni ŭ jakim razie va Ukrainie nie mohuć być choć niejkija adnapołyja šluby. Nie daj Boh, kab heta adbyłosia, i my nikoli nie budziem heta padtrymlivać».
Pierad ustupleńniem papravak u siłu zakonaprajekt pavinien padpisać ukrainski prezident Piatro Parašenka.
Kamientary