Svajaki padazravanaha ŭ sieryjnych zhvałtavańniach: «Jon pracavity, usim dapamahaŭ»
U Biełarusi zatrymali padazravanaha ŭ sieryjnych zhvałtavańniach. Pa viersii pravaachoŭnikaŭ, Aleh B. žyŭ na dźvie krainy, Rasiju i Biełaruś, i moh ździejśnić bolš za paŭsotni napadaŭ na žančyn.
Pa kolkaści recydyvaŭ padazravany moh pieraplunuć žachlivaha mańjaka ź Viciebščyny Hienadzia Michasieviča, jaki ŭ 70-ch i 80-ch ździejśniŭ 36 dakazanych zabojstvaŭ. Što praŭda, Aleh B. svaich achviar nie zabivaŭ. Jon adbiraŭ u ich kaštoŭnyja rečy i hvałciŭ.
«Jeŭraradyjo» vysłuchała pradstaŭnikoŭ MUS i Śledčaha kamiteta, źviazałasia sa stryječnym bratam padazravanaha i prahledzieła siamiejnyja fota.
***
Aleh B. naradziŭsia ŭ Ivanaŭskaj vobłaści Rasii. U piać hadoŭ pierajechaŭ u Bresckuju vobłaść, dzie pražyŭ da 1989-ha. Paśla źjechaŭ u Maskvu. Ale vielmi časta naviedvaŭsia ŭ Biełaruś da svajakoŭ.
Pieršaja žonka padazravanaha, Iryna, siońnia žyvie ŭ Biełaaziorsku. Ź joj Aleh B. maje ŭžo darosłaha syna Alaksandra. Z druhoj žonkaj, jakaja taksama maje biełaruskija karani, padazravany hadavaŭ vaśmihadovuju dačku Vieraniku.
«Toje, što jon zatrymany, viedajem. Toje, što pravodziać rasśledavańnie, viedajem. Niachaj pravodziać. Ale ŭ toje, što pišuć, my nie vierym, — vykazvajecca «Jeŭraradyjo» stryječny brat padazravanaha (mužčyna žyvie pad Baranavičami). — Aleh — narmalny čałaviek, pracavity. Pakul tut byvaŭ, absalutna ŭsim dapamahaŭ, chto prasiŭ. Tut u jaho maci. U dački — babula. Tamu jon siudy časta jeździŭ».
Pad Biarozaj, dzie ŭ padazravanaha žyvie maci, zdaralisia mnohija zhvałtavańni. U Sankt-Pieciarburhu Aleh B., pavodle papiaredniaj infarmacyi, dziejničaŭ u Anhlijskim parku i ŭ parku kala Čyrvonaj sažałki.
U pryceł sieryjnaha hvałtaŭnika ŭ nazvanych miescach traplali ŭ tym liku niepaŭnahadovyja.
Pa vialikim rachunku padazravany biespakarana dziejničaŭ ciaham 20 hadoŭ. Ale sioleta ŭ pačatku listapada jaho pa prybyćci ŭ Bresckuju vobłaść zatrymali. Pierad hetym rasijskija śledčyja pryjšli na pracu da Aleha B. i ciškom atrymali ź jaho słužbovaha «Mersedesa Spryntar» uzory DNK. Pa ŭsich złačynstvach jany supali.
Paśla zatrymańnia Aleha B. u Biełarusi rasijskija śledčyja zavitali ŭ jaho picierskuju kvateru. Tam znajšli ŭpryhožvańni, jakija byli adabranyja ŭ niekatorych achviaraŭ.
Rasijski žurnalist: Hvałtaŭnika mahli spynić raniej
Aŭtar papularnaha picierskaha partała fontanka.ru Jaŭhien Vyšankoŭ atrymaŭ infarmacyju, što ŭ 2007 hodzie Aleha B. zatrymali za sieryju zhvałtavańniaŭ u maskoŭskich parkach Tušyna. Ale pryznali nieadekvatnym i nakiravali na prymusovaje lačeńnie. Takim čynam, u 2009 hodzie Aleh B. znoŭku apynuŭsia na voli.
Stryječny brat padazravanaha śćviardžaje «Jeŭraradyjo», što pra nazvany pieryjad biełaruskija svajaki majuć zusim inšuju infarmacyju:
«Nakolki my čuli, Aleh prosta trapiŭ u avaryju i doŭha znachodziŭsia na lačeńni ŭ balnicy. Bolš my nie viedajem ničoha».
Padazravany stvaraje ŭražańnie dobraha siemjanina, myślara, prychilnika zdarovaha ładu žyćcia
Aleh B. nie lubiŭ fihuravać u sacyjalnych sietkach. Prynamsi, pad sapraŭdnym imieniem. Ale «Jeŭraradyjo» ŭdałosia znajści adnu sa staronak padazravanaha.
Mužčyna lubiŭ vystaŭlać fota ź dziećmi. Pry hetym vidavočna, što jon padtrymlivaŭ narmalnyja adnosiny ź pieršaj žonkaj, ź jakoj daŭno razyšoŭsia.
«Nie skazaŭ by pra toje, što jon byŭ niejkim zajadłym čałaviekam u płanie škodnych zvyčak. Jak zvyčajny słavianin lubiŭ časam vypić, ale bieź pierabolšvańnia», — tak apisvaje Aleha B. stryječny brat.
Na pracy padazravanamu dali stanoŭčuju charaktarystyku: nie pje, nie palić, zajmajecca ŭ trenažornaj zale.
«Navučyciesia zapluščvać vočy. Tak lohka, kali niama ŭ sercy złości», — siarod inšaha napisana ŭ apošnim statusie Aleha B. na staroncy ŭ sacsietkach.
Čamu padazravanaha ŭ zhvałtavańniach łavili bolš za 20 hadoŭ?
«Jon pryznajecca, što ździajśniaŭ hetyja złačynstvy ŭžo z 1994 hoda», — paviedamlaje infarmacyju Viktar Juzafovič, namieśnik načalnika Hałoŭnaha ŭpraŭleńnia kryminalnaha vyšuku MUS.
Pravaachoŭniki patłumačyli, jakija faktary ŭskładniali identyfikacyju padazravanaha.
«U Biełaruś jon pryjazdžaŭ epizadyčna pa svaich ułasnych spravach, što ŭskładniała jaho pošuk», — padkreślivaje Dźmitryj Kurčeŭski, śledčy pa asabliva važnych spravach Śledčaha kamiteta.
Alaksandr Turban, načalnik adździeła pa raskryćci złačynstvaŭ suprać asoby MUS, dadaje, što padazravany dobra błytaŭ ślady. Moh zhvałtavać achviaru ŭ Rasii i tut ža pajechać u Biełaruś, ci naadvarot.
«Paciarpiełyja źviartalisia ŭ pravaachoŭnyja orhany nie adrazu paśla ździajśnieńnia złačynstva. U šerahu vypadkaŭ — praź niekalki sutak. Tym samym uskładniałasia praca pa haračych śladach. U hety momant padazravany ŭžo źjazdžaŭ za miežy Biełarusi», — kaža Turban.
Milicyja prosić achviaraŭ i inšych hramadzian, jakija vałodajuć infarmacyjaj datyčna Aleha B., paviedamić pra heta.
Kamientary