My bačym praciah pracesu, užo akreślenaha analitykami. Aficyjnyja ideolahi pakrysie prasoŭvajucca na tradycyjnaje pole apazycyi. Piša ŭ svaim błohu Alaksandar Kłaskoŭski.
Kruhły stoł u «SB» pra BNR — źjava symptamatyčnaja. Pry ŭsich ahavorkach udzielniki addali naležnaje i samoj histaryčnaj padziei 90-hadovaj daŭniny, i tym ludziam, što sprabavali tady ŭvasobić ideju biełaruskaje dziaržaŭnaści.
Takim čynam, my bačym praciah pracesu, užo akreślenaha analitykami. Aficyjnyja ideolahi pakrysie prasoŭvajucca na tradycyjnaje pole apazycyi. Spakvala adaptujucca jaje lozunhi, datyčnyja dziaržaŭnaści dy niezaležnaści.
Letaś była seryja zładžanych uładami kancertaŭ «Za niezaležnuju Biełaruś». Sioleta ŭžo raspačaŭsia padobny maraton «My — biełarusy!» . Usio ž, zhadzieciesia, trochi inšaje, čym jak «rasiejcy sa znakam jakaści» ci navahodni teleprypieŭ «Ty bulbaš, ja bulbaš».
Niezaležnickija lozunhi ŭłada ŭžo tryvała ŭłučyła ŭ svoj pijaraŭski arsenał. Jašče trochi — i davodzić histaryčnaje značeńnie BNR taksama budzie, badaj, nie kramołaj, a sprobaj łamacca ŭ adčynienyja dźviery.
Ale kansalidacyjaj pa-raniejšamu i nie patychaje. Letaś pradstaŭniki niezaležnaha hramadztva, što źviarnulisia da ŭładaŭ z zaklikam razam adśviatkavać Dzień voli, atrymali jarłyk "šałudzivych ludziej".
Sioleta šeście 25 sakavika znoŭ pasłali na Banhałor. A pakolki publika ŭsio adno naceliłasia na inšy maršrut — čakajma kalizijaŭ. Mahčyma, ad zališniaj brutalnaści siłavikoŭ utrymajuć, ale metoda drobnaha fołu, chutčej za ŭsio, budzie ŭžytaja napoŭnicu. Tradycyjnaja preventyŭnaja neŭtralizacyja aktyvistaŭ pačałasia ŭžo.
Pryznać, chaj sabie z ahavorkami, zasłuhi Łuckievičaŭ, Losika, Varonki dy inšych dziejačaŭ, što daŭno skončyli ziamny šlach, dla ŭłady praściej, čym pryznać prava siońniašnich apazycyjaneraŭ na baraćbu za tyja ideały BNR, da ŭvasableńnia jakich jašče jak da Miesiaca.
Historyja paŭtarajecca. Niekali tyja, chto stajaŭ la kałyski BNR, padšturchnuli balšavikoŭ stvaryć BSSR (dakładniej, napačatku SSRB). Ale jakuju padziaku atrymali ad savieckaj ułady Łastoŭski, Losik, Taraškievič, Ćvikievič dy inšyja, sami viedajecie. Siońnia biełaruskaja kiroŭnaja viarchoŭka avałodała niezaležnickimi lozunhami, uzhadavanymi ŭ asiarodku jaje palityčnych apanentaŭ. Ale medaloŭ im za heta nie daduć. Chiba što dahoniać dy jašče raz daduć.
Ciapier čytajuć
Miedyjny pres-sakratar MNS Vital Damboŭski pajšoŭ u psichołahi-seksołahi3
Kamientary