U Jeŭrazijskim ekanamičnym sajuzie z 1 studzienia 2016 hoda budzie zabaroniena handlavać «lejkoznym» małakom, paviedamili ŭ pres-słužbie Jeŭrazijskaj ekanamičnaj kamisii.
«Techničny rehłamient Mytnaha sajuza «Ab biaśpiecy charčovaj pradukcyi», jaki źmiaščaje ŭ tym liku patrabavańni da syroha małaka, pryniaty rašeńniem Kamisii Mytnaha sajuza ŭ śniežni 2011 hoda. Treba padkreślić, što nazvany techničny rehłamient ustupiŭ u siłu ŭ lipieni 2013 hoda. Z 1 studzienia 2016 hoda patrabavańni techrehłamientu ab biaśpiecy charčovaj pradukcyi MS, jakija zabaraniajuć handal «lejkoznym» małakom, u krainach JEAES stanuć abaviazkovymi», — havorycca ŭ kamientaryi pres-słužby JEEK.
U adpaviednaści z hetym dakumientam da abaračeńnia ŭ sajuzie dapuskajecca syroje małako, atrymanaje tolki ad zdarovych karoŭ. Pryčym z haspadarak, dzie niama zaraznych zachvorvańniaŭ žyvioł. Siarod takich zachvorvańniaŭ nazvany i lejkoz. Jon trapiŭ u techničny rehłamient Mytnaha sajuza ŭ adnym śpisie ź niebiaśpiečnymi chvarobami: jaščuram, čumoj, brucelozam.
Takoje abmiežavańnie dziejničaje ŭ mnohich dziaržavach, naprykład, u krainach Jeŭrasajuza.
«Vytvorcam małaka i małočnych praduktaŭ dziaržaŭ sajuza było pradastaŭlena dastatkova času dla padrychtoŭki da raboty ŭ novych umovach: źmianieńnia technałohij, praviadzieńnia nieabchodnych prafiłaktyčnych mierapryjemstvaŭ i h.d., — padkreślivajecca ŭ kamientaryi. — Akramia taho, mnohija viadučyja vytvorcy prymali ŭdzieł u raspracoŭcy jak techničnaha rehłamientu «Ab biaśpiecy charčovaj pradukcyi», tak potym i techrehłamientu sajuza «Ab biaśpiecy małaka i małočnaj pradukcyi». Takim čynam, pradstaŭniki viadučych małočnych kampanij de-fakta źjaŭlajucca suraspracoŭščykami klučavych dakumientaŭ, što rehulujuć pytańni biaśpieki pradukcyi ŭ hetaj śfiery».
U JEEK taksama adznačyli, što da 31 śniežnia 2015 hoda ŭ JEAES dapuskajucca vytvorčaść i vypusk małaka i małočnaj pradukcyi ŭ adpaviednaści z nacyjanalnymi, pryniatymi da «charčovaha» techrehłamientu, narmatyŭnymi pravavymi aktami. Heta značyć pierachodny pieryjad, jaki daje mahčymaść biźniesu padrychtavacca da raboty pa novych patrabavańniach, skłaŭ čatyry hady.
Kamientary