Alaksandr Łukašenka i Ilcham Alijeŭ abaviazalisia sadziejničać raźvićciu palityčnaha dyjałohu pamiž Biełaruśsiu i Azierbajdžanam, umacavańniu vysokaha ŭzroŭniu davieru, uzajemarazumieńnia i šmatpłanavaha supracoŭnictva. Pra heta havorycca ŭ sumiesnaj dekłaracyi, jakuju jany padpisali pa vynikach pieramoŭ u Minsku 28 listapada.
Sustreča Łukašenki i Alijeva prajšła ŭ vuzkim i pašyranym składach.
Kiraŭniki dziaržaŭ taksama ŭziali na siabie abaviazacielstvy «ŭsialak naroščvać dasiahnuty vysoki ŭzrovień biełaruska-azierbajdžanskich adnosinaŭ, zasnavanych na tradycyjach uzajemnaj pavahi i družby pamiž narodami»
Padkreślivajučy važnaść dalejšaha raźvićcia ŭzajemadziejańnia dźviuch krain na mižnarodnaj arenie, Łukašenka i Alijeŭ, zaznačajecca ŭ dekłaracyi, buduć sadziejničać pahłybleńniu supracoŭnictva i kaardynacyi namahańniaŭ pa akazańni ŭzajemnaj padtrymki ŭ śfiery źniešniaj palityki. Pry hetym paćviardžajecca supadzieńnie i blizkaść pazicyj pa mnohich pytańniach mižnarodnaj tematyki.
Abodva kiraŭniki taksama abaviazalisia «sadziejničać intensifikacyi pracy ŭradaŭ Biełarusi i Azierbajdžana pa realizacyi tradycyjnych i pošuku novych form ekanamičnaha supracoŭnictva ŭ pierśpiektyŭnych śfierach uzajemadziejańnia, jakija achoplivajuć mašynabudavańnie, transpart, sielskuju haspadarku, suviaź, achovu zdaroŭja, adukacyju i navuku».
Aprača taho, u dekłaracyi havorycca, što «baki buduć sadziejničać pašyreńniu suviaziej i kantaktaŭ pamiž tvorčymi sajuzami i abjadnańniami, dziejačami kultury, litaratury i mastactva, maładziožnymi arhanizacyjami, zachavańniu nacyjanalnaj samabytnaści narodaŭ dźviuch krain».
U prysutnaści kiraŭnikoŭ dziaržaŭ byŭ padpisany dahavor ab sacyjalna-ekanamičnym supracoŭnictvie Biełarusi i Azierbajdžana da 2025 hoda i prahrama sacyjalna-ekanamičnaha supracoŭnictva dźviuch krain na hety ž pieryjad. Dakumienty nakiravanyja na dalejšaje ŭmacavańnie i dyviersifikacyju handlova-ekanamičnych suviaziej na asnovie ŭzajemnych intaresaŭ, a taksama jakasnaje palapšeńnie žyćcia nasielnictva dźviuch krain.
Aprača taho, Ministerstvam pracy i sacyjalnaj abarony Biełarusi i Dziaržaŭnym fondam sacyjalnaj abarony Azierbajdžana padpisany pratakoł ab supracoŭnictvie ŭ śfiery abaviazkovaha dziaržaŭnaha sacyjalnaha strachavańnia.
Pahadnieńnie ab supracoŭnictvie padpisali nacyjanalnyja akademii navuk dźviuch krain, Biełaruski respublikanski fond fundamientalnych daśledavańniaŭ i Fond raźvićcia navuki pry prezidencie Azierbajdžana.
Na dumku Łukašenki, realizacyja padpisanych dakumientaŭ budzie sadziejničać dalejšamu pašyreńniu ŭzajemavyhadnych biełaruska-azierbajdžanskich suviaziej u palityčnym, handlova-ekanamičnym, navukova-techničnym i humanitarnym supracoŭnictvie.
Biełaruski kiraŭnik zaznačyŭ, što baki taksama vyjšli na novyja kirunki supracoŭnictva ŭ śfiery infarmacyjnych, nana- i bijatechnałohij, vajenna-pramysłovaha kompleksu, navukovych daśledavańniaŭ.
Kamientary