Human Rights Watch abvinavaciła Rasieju i Siryju va ŭžyvańni kasietnych bombaŭ

Pravaabarončaja arhanizacyja Human Rights Watch abvinavaciła Maskvu i Damask va ŭžyvańni kasietnych bojeprypasaŭ. Pavodle infarmacyi pravaabaroncaŭ, z 30 vieraśnia na terytoryi Siryi nie mienš za 20 razoŭ vykarystoŭvalisia kasietnyja bomby

Pavialičyć

Zhodna z dakładam, apublikavanym supracoŭnikami pravaabarončaj arhanizacyi Human Rights Watch, padčas apieracyi ŭ Siryi ŭradavyja vojski i rasijskija VKS pa mienšaj miery 20 razoŭ užyvali kasietnyja bojeprypasy. Usiaho, pa infarmacyi pravaabaroncaŭ, u vyniku hetych udaraŭ paciarpieli 35 mirnych žycharoŭ — u tym liku piać žančyn i 17 dziaciej, dziasiatki čałaviek atrymali ranieńni. Dźvie ataki pryjšlisia na łahier biežancaŭ, adna — na škołu ŭ pryharadzie Damaska, paviedamlajecca ŭ dakładzie.

Pravaabaroncy śćviardžajuć, što Human Rights Watch zmahła vyznačyć, što kasietnyja bomby, jakija prymianiajucca ŭ Siryi, byli vyrableny ŭ SSSR i Rasii. U dakładzie taksama śćviardžajecca, što pry dapamozie analizu fota- i videamateryjałaŭ i intervju ź miascovymi žycharami Human Rights Watch zmahła vyznačyć siem typaŭ kasietnych bojeprypasaŭ, jakija vykarystoŭvalisia pry avijaŭdary ŭ siryjskich pravincyjach Alepa, Chama i Idlib. Pravaabaroncy taksama padkreślivajuć, što za hetymi ŭdarami moža stajać tolki ŭradavaja armija Siryi abo rasijskija VKS, bo ŭzbrojenyja apazicyjnyja hrupy nie vykarystoŭvajuć avijacyju.

Akramia taho, pravaabaroncami byŭ zafiksavany vypadak prymianieńnia rakiety 9M55K, jakaja była zapuščana z bazy na poŭnač ad horada Chama, u rajonie, kantralavanym siryjskimi vojskami. Usie niadaŭnija ŭdary z vykarystańniem kasietnych bombaŭ byli zafiksavanyja Human Rights Watch na terytoryjach, jakija kantralujucca apazicyjaj, padkreślivajecca ŭ dakładzie. Pry hetym, pa śćviardžeńni pravaabaroncaŭ, vyśvietlić, chto mienavita za ich adkazny — uradavyja vojski ci rasijskija siły, — niemahčyma, bo jany časta pravodziać sumiesnyja apieracyi i vykarystoŭvajuć adnolkavuju zbroju.

U dakładzie taksama adznačajecca, što niekatoryja typy kasietnych bojeprypasaŭ byli zafiksavanyja ŭ Siryi tolki paśla pačatku rasijskaj apieracyi. Human Rights Watch robić vysnovu, što albo rasijskija VKS ich užyli, albo ŭłady Rasii niadaŭna pastavili ich siryjskamu ŭradu.

U kastryčniku hetaha hoda Human Rights Watch vypuściła dakład, pavodle jakoha ad avijaŭdaraŭ mierkavana rasijskich VKS zahinuli 59 mirnych žycharoŭ, ź jakich 33 dziciaci i adzin kamandujučy miascovaj apazicyjnaj hrupaj. Adzin z udaraŭ, pavodle źviestak pravaabaroncaŭ, byŭ naniesieny pa žyłym domie ŭ nasielenym punkcie Hanta, a druhi — pa susiednim horadzie Cier-Maalech. U Kramli hety dakład nazvali «hazietnaj kačkaj».

Raniej Maskva nieadnarazova abviarhała abvinavačvańni va ŭdarach pa apazicyi i mirnych žycharach u Siryi, dadzienyja ab hibieli hramadzianskich asob kiraŭnictva krainy nazvała «infarmacyjnymi atakami».

Kanviencyja ab zabaronie vykarystańnia kasietnych bojeprypasaŭ (Convention on Cluster Munitions, CCM) była raspracavana ŭ 2008 hodzie. Rasija razam z ZŠA, Kitajem, Indyjaj, Pakistanam, Izrailem, Paŭdniovaj Karejaj, a taksama Siryja da hetaj mižnarodnaj damovy nie dałučylisia.

• 0
• 0
• 0
• 0
• 0
• 0
• 0
• 0