Śviatłana Aleksijevič pra prysud Nadziei Saŭčancy: Heta varjactva ŭłady
Laŭreatka Nobeleŭskaj premii Śviatłana Aleksijevič, jakaja ciapier znachodzicca ŭ Berlinie, prakamentavała prysud ukrainskaj lotčycy Nadziei Saŭčancy. Sud u Daniecku Rastoŭskaj vobłaści pryznaŭ Nadzieju Saŭčanku vinavataj i asudziŭ na 22 hady źniavoleńnia.
«Heta ŭžo nia prosta złačynstva ŭłady, heta niejkaje varjactva ŭłady, jakaja ŭžo znachodzicca ŭ niejkim ekstazie ad svaich mahčymaściaŭ i ad svajoj biespakaranaści. Bo ŭsim ža vidavočna, što heta palityčny praces, jaki nia maje pad saboj nijakich padstaŭ. Što sudziać nie Nadzieju Saŭčanku, a sudziać Ukrainu. Ukrainie chočuć pakazać, śvietu chočuć pakazać, što, maŭlaŭ, nichto nam nia ŭkaz. Ale ŭsio heta nahadvaje niejkaje varjactva. Niejkuju ahoniju. Bo palityka ŭsio ž, jak by tam ni było, heta razumnyja dziejańni ŭ peŭnaj stupieni. A heta ŭsio navat nie razumna.
My ŭsie zachoplenyja mužnaściu Nadziei, my ŭsie jaje nie pakiniem i budziem dalej za jaje ŭsie zmahacca. I ŭsio-tki ja spadziajusia, što my pieramožam. Nu nia mohuć ža jany być macniejšyja za ŭsich nas».
Raniej Śviatłana Aleksijevič i jašče amal 300 dziejačaŭ navuki, kultury, biznesu z usiaho śvietu padpisali zvarot u abaronu Nadziei Saŭčanki. U zvarocie jany zaklikajuć eŭrapiejskich lideraŭ «pryniać nadzvyčajnyja miery z metaj nieadkładnaha i biezumoŭnaha vyzvaleńnia» Nadziei Saŭčanki.
Ale čamu ŭłady Rasiei zastajucca niepachisnymi? Na heta Śviatłana Aleksijevič skazała:«Heta ŭžo niejkaje varjactva ŭładaŭ ad svaich mahčymaściaŭ siońniašnich. Heta varjactva ad našaha maŭčańnia, što my ŭsie maŭčym. Nu što tam niekalki dziasiatkaŭ i navat socień čałaviek? A narod ža maŭčyć. Niadaŭna ja pračytała interviju ź ludźmi z Daniecku. Viedajecie, nivodzin nie skazaŭ niešta inšaje, aproč jak «stralać, da ścienki». Ja spužałasia takoha naroda».
Śpievaka z «Marafonu adzinstva» asudzili za palityku — pryhadali kamientary 2020-ha. Baranić u sud jaho chadzili siostry Hruździevy16
Kamientary