Źviestki pra vakansii sakavika ŭ Minsku i rehijonach: chto patrabujecca i na jakija zarobki

Stalica: ajcišniki, dyrektary, mieniedžary

Napieradzie pa zarobkach, jak zvyčajna, ajcišniki. Pryčym, u adroźnieńni ad inšych vakansij, tut zarobak paznačajuć mienavita ŭ valucie, bo čaściej za ŭsio jon pryviazany da dalara i vahańni biełaruskaha rubla na jaho nie ŭpłyvajuć. «Kreatyŭny i matyvavany pradukt-mieniedžar» moža raźličvać na zarpłatu ad 2 da 5 tysiač dalaraŭ. Supracoŭnika šukaje kampanija, jakaja zajmajecca raspracoŭkaj mabilnych dadatkaŭ.

Ad 1,5 da 4 tysiač dalaraŭ prapanujuć raspracoŭščykam prahramnaha zabieśpiačeńnia. U kampaniju, jakaja raspracoŭvaje mabilnyja hulni i dadatki śpiecyjalista pa pryciahnieńniu karystalnikaŭ šukajuć na zarobak ad 1,2 da 3,5 tysiač dalaraŭ. Akramia hrošaj, pracadaŭcy abiacajuć supracoŭniku kursy anhlijskaj movy i techniku ad «Epł».

Uvohule, vakansij prahramista ci raspracoŭščyka chapaje. Zarobak abiacajuć dla Biełarusi vielmi dobry, jak praviła – da 3-3,5 tysiač dołaraŭ. Pry hetym, nižniaja płanka roznaja: chtości prapanuje ad 1 tysiačy, chtości – ad 2,5.

Kali vam bližej nie biazdušnyja kampjutary, a žyvyja ludzi, to možna pasprabavać siabie na pasadzie mieniedžara. Naprykład, u kampaniju, jakaja zajmajecca prodažam karmoŭ, patrabujecca «mieniedžar, jaki ŭ pierśpiektyvie stanie kiraŭnikom». Prapanujuć ad 25 miljonaŭ rubloŭ. Kandydatu treba adpaviadać nastupnym kryteram:

«Idealny pieramoŭščyk. Vałodaje daram pierakanańnia. Usio viedaje, umieje, navat kali nie ŭmieje, znojdzie taho, chto ŭmieje. NIE skuholić, NIE płača. Nizki maralny paroh. Analityčny skład rozumu. Słoŭ: nie chaču, nie budu, nie viedaju, mnie lanota, zaŭtra NIE VIEDAJE. Adkazny. Kamunikabielny. Znachodlivy».

Što takoje «nizki maralny paroh» nie ŭdakładniajecca, tak što hladzicie sami.

Uvohule, vakansij mieniedžaraŭ pa prodažach vielmi mnoha. Ale, jak praviła, zarpłata ŭ ich nie fiksavanaja i zaležyć ad zaroblenaha.

Niebłahija zarobki i ŭ kiraŭnikoŭ pradpryjemstvaŭ. ZAT «Čajna Mierčants SiEjčEn-Bi Eł Ar Kamiercyjnaja i Łahistyčnaja Kampanija» šukaje sabie hiendyrektara. Kali čałaviek viedaje kitajskuju i anhlijskuju i maje dośvied kiraŭnictva kitajskaj arhanizacyjaj abo pradstaŭnictvam ŭ RB – moža raźličvać na 60 miljonaŭ.

Dyrektaru, jaki maje dośvied pracy ŭ śfiery kansałtynhu pa technałohijach identyfikacyi i dohladzie za žyviołami nie mienš za 15 hadoŭ, svabodna vałodaje anhlijskaj, polskaj i niamieckaj prapanujuć 46 miljonaŭ. Kiraŭnik pradpryjemstva, jakoje zajmajecca zakupkaj i pieraapracoŭkaj hryboŭ i jahad, moža raźličvać na 21 miljon rubloŭ.

Dobryja zarobki ŭ pryvatnych miedycynskich ustanovach. Darečy, šmat dzie patrabujucca stamatołahi. Zahadčyku stamatałahičnaha adździaleńnia prapanujuć ad 15 da 30 miljonaŭ. «Zvyčajnamu» stamatołahu – 20 miljonaŭ. Dla paraŭnańnia – stamatołahu dziaržaŭnaj palikliniki abiacajuć usiaho tolki ad 6 da 9 miljonaŭ.

Na niebłahija hrošy moža raźličvać roznarabočy-budaŭnik, jaki pavinien być i stolaram, i ciaślarom, i stracharom… Praŭda, zarabić taki śpiecyjalist šyrokaha profilu moža narmalna – jamu prapanujuć 20 miljonaŭ rubloŭ plus, kali pracavać budzie vachtavym mietadam, pradastaviać žytło. Bietonščyk moža raźličvać na 10 miljonaŭ. A supracoŭnik, čyja pasada paznačana prosta jak «budaŭnik», zvyčajna moža zarabić ad 5 da 10 miljonaŭ rubloŭ.

Nievysokija zarobki ŭ nastaŭnikaŭ. Naprykład, u zvyčajnaj škole nastaŭnikam chimii i nastaŭnikam pačatkovych kłasaŭ prapanujuć ad 4 miljonaŭ. Dla paraŭnańnia: pryjomščyk u sietku prakatu rovaraŭ moža atrymać 4,5 miljony, biez usiakaj adukacyi. Jašče i biaspłatna karystacca rovaram.

U rehijonach: defiektołah zarablaje jak prybiralščyca

U abłaściach prapanujuć zusim inšyja hrošy. Naprykład, zarpłata doktara niaredka ŭdvaja mienšaja, čym u Minsku, niedzie ŭvohule dachodzić da absurdu. Tak, naprykład, jość vakansija doktara-akušera-hiniekołaha u homielskaj paliklinicy. Zarpłata – 2,3 miljona. Stolki ž abiacajuć nastaŭnikam-defiektołaham u rajonnych haradach. Dla paraŭnańnia: ad 2-2,5 miljonaŭ rubloŭ u Viciebsku i Homieli prapanujuć taksama kačaharam ci prybiralščycam (a ŭ minskich klininhavych kampanijach prybiralščycam prapanujuć uvohule ad 4,2 miljonaŭ).

U rehijonach vakansij dyrektaroŭ užo nie tak šmat, dy i zarpłaty mienšyja. Tut praściej uładkavacca vadzicielem-mižnarodnikam (ad 20 da 40 miljonaŭ) ci iznoŭ ža prahramistam (zvyčajna prapanujuć da 2 tysiač dołaraŭ ci jeŭra). Jak i ŭ Minsku šmat chto šukaje mieniedžaraŭ pa prodažach.

U Hrodnie, naprykład, možna ŭładkavacca piłotam dla praviadzieńnia avijacyjna-chimičnych rabot u sielskaj haspadarcy. Zarobak tak sabie – ad 3,6 da 5,7 miljonaŭ.

Akciory, akrabaty, kłouny

Niaprosta zarabić na žyćcio i tvorčym ludziam. Vakansij dla aktoraŭ ci artystaŭ chapaje, voś tolki zarpłata zusim nie vialikaja. Artyst dramy ŭ Homieli moža raźličvać na 2,5 miljony (što cikava, ŭ Mazyry – na 3,2), artyst baleta ŭ Hrodnie – na 2,8 miljona, kłoun ci akrabat u Minsku – na 2,6 miljona.

Kali vy vyrašyli stać śpievakom u chory, to taksama na vialikija hrošy nie raźličvajcie. Nacyjanalnaja Dziaržaŭnaja Teleradyjokampanija šukaje sabie artysta chora na zarpłatu ŭ 2,5 miljona. U Homieli i ŭ Hrodnie možna ŭładkavacca na pasadu kiraŭnika chora vieteranaŭ. Zarobak – 2,3 miljona rubloŭ.

• 0
• 0
• 0
• 0
• 0
• 0
• 0
• 0