Prapanovy ab dacie Usiebiełaruskaha narodnaha schodu buduć padadzienyja Łukašenku da 15 krasavika

Prajekt asnoŭnych pałažeńniaŭ prahramy sacyjalna-ekanamičnaha raźvićcia Biełarusi na 2016—2020 hady pavinien być padadzieny Alaksandru Łukašenku da 15 krasavika, paviedamiŭ premjer-ministr Andrej Kabiakoŭ 6 krasavika na pasiadžeńni arhkamiteta pa padrychtoŭcy i praviadzieńni 5-ha Usiebiełaruskaha narodnaha schodu.

Kabiakoŭ udakładniŭ, što da 15 krasavika na razhlad kiraŭnika dziaržavy buduć uniesienyja prapanovy ab dacie praviadzieńnia schodu.

Paviedamlajecca, što arhkamitet mierapryjemstva stvorany rasparadžeńniem Łukašenki ad 30 sakavika. «Usiebiełaruski narodny schod — heta znakavaje palityčnaje mierapryjemstva. Jano aznačaje nie tolki zaviaršeńnie piacihadovaha pieryjadu raźvićcia krainy, ale i z ulikam ciapierašnich hieapalityčnych i ekanamičnych realij — pačatak novaha etapu ŭ žyćci jak našaha hramadstva, tak i dziaržavy ŭ cełym», — upeŭnieny premjer-ministr.

Pavodle jaho słoŭ, stvarajucca piać rabočych hrup pa padrychtoŭcy i praviadzieńni schodu, jakija «buduć vieści arhanizacyjnuju i ideałahičnuju pracu, rychtavać adpaviednyja materyjały». Hrupu pa arhpytańniach uznačalić pieršy namieśnik kiraŭnika Administracyi prezidenta Kanstancin Martyniecki, hrupu pa ideałahičnym zabieśpiačeńni — namieśnik kiraŭnika Administracyi prezidenta Ihar Buzoŭski, hrupu pa kaardynacyi pracy ŚMI — vice-premjer Natalla Kačanava, hrupu pa pracy z dypkorpusam, zamiežnymi haściami i pradstaŭnikami biełaruskich dyjaspar — pieršy namieśnik kiraŭnika MZS Alaksandr Michnievič, hrupu pa materyjalna-techničnym zabieśpiačeńni mierapryjemstva — pieršy namieśnik kiraŭnika spraŭ prezidenta Mikałaj Sielivanaŭ.

Nahadajem, mienavita na Usiebiełaruskim narodnym schodzie tradycyjna prymajuć płany na novuju «piacihodku». Raniej schod zaŭsiody pravodziŭsia niezadoŭha da prezidenckich vybaraŭ. Minuły hod staŭ vyklučeńniem: vybary adbylisia 11 kastryčnika, ale schod tak i nie praviali. 15 kastryčnika 2015 hoda staršynia Savieta Respubliki Michaił Miaśnikovič, vystupajučy na siesii vierchniaj pałaty parłamienta, paviedamiŭ, što delehatam narodnaha schodu budzie padadzienaja prahrama sacyjalna-ekanamičnaha raźvićcia Biełarusi na 2016—2020 hady. Kali moža prajści schod, Miaśnikovič nie ŭdakładniŭ.

Ministr ekanomiki Uładzimir Zinoŭski 2 sakavika na sustrečy z kiraŭnikami kampanii «Havary praŭdu» Taćcianaj Karatkievič i Andrejem Dźmitryjevym paviedamiŭ, što narodny schod płanujecca pravieści ŭ kancy maja — pačatku červienia. Kali mierapryjemstva budzie arhanizavanaje ŭ hety pieryjad, to jano projdzie napiaredadni parłamienckich vybaraŭ, jakija pavinny adbycca nie paźniej za 11 vieraśnia.

U svaju čarhu Michaił Miaśnikovič, jaki ŭznačalvaje pracoŭnuju hrupu pa padrychtoŭcy prajekta prahramy sacyjalna-ekanamičnaha raźvićcia na najbližejšyja piać hadoŭ, 4 krasavika raskrytykavaŭ prapanavany prajekt. Pavodle jaho słoŭ, «dakumient maje šmat ahulnych razvah, tady jak nieabchodnaja kankretnaja pastanoŭka zadač i šlachoŭ ich vyrašeńnia». Miaśnikovič daručyŭ členam Savieta Respubliki da 11 krasavika padać svaje zaklučeńni i prapanovy pa prajekcie.

Usiebiełaruski narodny schod — ahulny schod pradstaŭnikoŭ urada i inšych halin ułady, kiraŭnikoŭ i pracaŭnikoŭ pradpryjemstvaŭ, dziejačaŭ navuki i kultury. Na schod vyłučajucca delehaty z usich rehijonaŭ krainy. U jaho miežach aceńvajucca dziejańni ŭłady za minułyja piać hadoŭ i vyznačajucca asnoŭnyja napramki i paramietry raźvićcia dziaržavy, zaćviardžajecca płan ekanamičnaha i sacyjalnaha raźvićcia krainy na budučy piacihadovy termin.

• 0
• 0
• 0
• 0
• 0
• 0
• 0
• 0