Dziaržava stvaraje słužbu «muž na hadzinu»

Na pradpryjemstvie stvoranyja dźvie dadatkovyja bryhady dla akazańnia płatnych bytavych pasłuh nasielnictvu ŭ vychadnyja i śviatočnyja dni. U ich skład uvojduć santechniki i elektryki. Užo raspracavany prejskurant pasłuh, ź jakim možna aznajomicca na sajcie haradskoj avaryjnaj słužby avarijka.by.

Tam ža ŭ raździele «zvarotnaja suviaź» kiraŭnictva pradpryjemstva raźličvaje ŭbačyć mierkavańnie haradžan ab svaich rascenkach. Vodhuki patencyjnych klijentaŭ abiacajuć pryniać da viedama.

— Na hetym tydni płanujem zaklučyć damovu z RDC, kab haradžanie mahli apłačvać akazanyja našaj słužbaj bytavyja pasłuhi pa žyroŭcy, — rastłumačyŭ dyrektar UP «Haradskaja avaryjnaja słužba» Alaksandr Jerafiejeŭ. — Paralelna viadziom nabor śpiecyjalistaŭ u novyja bryhady.

Da pošuku rabotnikaŭ na pradpryjemstvie padychodziać vielmi surjozna: šukajuć prafiesijanałaŭ vysokaha ŭzroŭniu z hodnym źniešnim vyhladam i dobrymi manierami. Ekipažy buduć źmiašanymi, kab kožny moh vykanać kompleks rabot jak pa santechnicy, tak i pa elektrycy. Čakajecca, što jany pačnuć pracavać z 1 maja.

Na dumku Alaksandra Jerafiejeva, bryhady, sfarmavanyja ŭ avaryjcy, zmohuć skłaści kankurencyju pryvatnym kampanijam, u tym liku i pa canie. Naprykład, zhodna z prejskurantam, ramont vyklučalnika/razietki z ulikam prabiehu mašyny, ale biez uliku materyjałaŭ, abydziecca ŭ 142 900 rubloŭ. Kab atrymać anałahičnuju pasłuhu ad «muža na hadzinu», zhodna z praviłami adnoj z papularnych pryvatnych kampanij, pryjdziecca apłacić jak minimum pieršuju hadzinu jaho pracy, jaki pa prejskurancie, apublikavanym na sajcie hetaj arhanizacyi, składaje 298 000 rubloŭ.

Jak paviedamiŭ dyrektar Haradskoj avaryjnaj słužby, na jaje pašyreńnie ź listapada 2015 zatračana 1,5 miljarda rubloŭ. U pryvatnaści, zakuplena 12 novych «Piežo». Jany pryznačanyja dla pieravozki ekipažaŭ elektramancioraŭ. Akramia taho, majecca 12 «UAZaŭ», na jakich vyjazdžajuć na vykliki ślesary AVM — santechniki, i 3 mašyny dla ekipažaŭ elektrahazazvarščykaŭ. Usie jany całkam asnaščanyja nieabchodnym abstalavańniem, materyjałami, srodkami indyvidualnaj abarony.

— Na bałansie pradpryjemstva 48 adzinak techniki, ź ich 27 — technika avaryjna-adnaŭlenčaj słužby, — udakładniŭ Alaksandr Jerafiejeŭ.

Dziakujučy pašyreńniu parku transpartnych srodkaŭ ciapier ekipažy avaryjnaj słužby prybyvajuć u termin da 30 chvilin na 81% usich zajavak, u termin da 60 chvilin — na 15% vyklikaŭ, da 90 chvilin — na 4%. Pa słovach kiraŭnika avaryjnaj słužby, tyja vykliki, na jakija bryhady dabirajucca bolš za hadzinu, nie adnosiacca da razradu ekstremalnych.

— Kab paskoryć čas prybyćcia na vyklik, byli stvoranyja dadatkova 2 liniejnyja adździaleńni: na vulicy Matusieviča i ŭ zavułku Biechcierava, dzie taksama bazujucca našy ekipažy, — padkreśliŭ Alaksandr Jerafiejeŭ. — Ale časam dajechać va ŭkazany termin da miesca niemahčyma pa abjektyŭnych pryčynach. Jak praviła, praz składanuju darožnuju situacyju.

• 0
• 0
• 0
• 0
• 0
• 0
• 0
• 0