Uzdoŭž biełaruskaj miažy Rasieja stvaraje novyja vajskovyja bazy sa «značnym udarnym patencyjałam», zaŭvažajuć daśledčyki-valantery.
Ešalony vajskovaj techniki i prynamsi 214 vajskoŭcaŭ 28-j asobnaj motastrałkovaj bryhady ź Jekaciarynburhu prybyli pad biełaruskija miežy, u Klincy Branskaj vobłaści, što za 90 km ad Homiela, piša InformNapalm.
Pra heta śviedčać šmatlikija zdymki ŭ sacsietkach, jakija publikujuć u tym liku sami rasiejskija vajskoŭcy, a taksama publikacyi miascovych ŚMI.
«U hety momant vajskoŭcy znachodziacca ŭ palavym lahiery na ŭskrainie horadu, kaardynaty 52.7780623,32.2027034, — piša InformNapalm. — Całkam mažliva, jany buduć tam usio leta, bo kolišnija vajskovyja častki ŭ miežach horadu jašče nie adnoŭlenyja».
Jak śćviardžaje vydańnie, bryhada, što raźmiaściłasia kala aŭtamahistrali Homiel-Bransk, «atrymała značny bajavy dośvied u vyniku rasiejskaj vajskovaj ahresii suprać Ukrainy i Syryi».
Taksama vydańnie źviartaje ŭvahu, što Biełaruś i Rasieja — vajskovyja chaŭruśniki dy majuć adzinuju rehijanalnuju hrupoŭku vojskaŭ. Da taho ž pamiž Biełaruśsiu i Rasiejaj niama pamiežnaha kantrolu.
Pres-sakratar Ministerstva abarony Biełarusi Uładzimier Makaraŭ admoviŭsia kamentavać dadzienuju infarmacyju dy paraiŭ čytać Kancepcyju nacyjanalnaj biaśpieki i vajskovuju daktrynu Biełarusi:
«Tam vielmi vyrazna rasstaŭlenyja ŭsie akcenty, — zapeŭnivaje Makaraŭ. — I Biełaruś abaviazkova budzie vykonvać usie svaje abaviazalnictvy pa zabieśpiačeńni kalektyŭnaj biaśpieki va Ŭschodnieeŭrapiejskim rehijonie».
Niezaležny vajenny ekspert Alaksandar Alesin nia bačyć u hetym pahrozy:
«Na terytoryi Smalenskaj i Branskaj abłaściej jany miarkujuć sfarmavać dźvie motastrałkovyja dyvizii, jašče adnu ŭ Paŭdniovaj vajskovaj akruzie, — kaža jon. — Całkam vierahodna, što jany nasamreč pravodziać rekahnascyroŭku miascovaści, dzie buduć raźmieščanyja abjekty hetych dyvizijaŭ. Ja čuŭ, što Šajhu pryjaždžaŭ u toj rehijon, ahladaŭ miescy budučych dyślakacyjaŭ».
Ale, miarkuje Alesin, hetaje raźmiaščeńnie — mahčymaje nastupstva taho, što Rasieja nia całkam daviaraje Biełarusi ŭ pytańni abarony, vybudoŭvaje «druhuju liniju abarony» na svajoj terytoryi.
«Łukašenka nia raz kazaŭ, što ŭ Rasiei, akramia biełaruskaha vojska, pa darozie na Maskvu ničoha niama, i heta byŭ jahony kozyr, jakim jon aperavaŭ u pieramovach z Rasiejaj, patrabujučy niejkich preferencyjaŭ, kredytaŭ, tannych enerhanośbitaŭ, — kaža ekspert. — A ciapier Rasieja, jak mnie zdajecca, demanstruje, što nia vielmi ŭpeŭnienaja ŭ svaim sajuźniku».
Va ŭmovach, kali NATO naroščvaje kantynhienty ŭ Polščy i Prybałtycy (navat na ratacyjnaj asnovie), Rasieja takim čynam taksama demanstruje svaju niezadavolenaść, dadaje Alesin.
«A dla nastupalnaj aperacyi patrebnyja suadnosiny adzin da čatyroch na karyść napadnika, — kaža ekspert. — I tady tam pavinny byli b źjavicca nia dźvie dyvizii, a prynamsi dźvie armii — tanki, artyleryja, avijacyja i hetak dalej. I my pabačym takija pierasoŭvańni, i spadarožnikavaja vyviedka NATO zaŭvažyć heta. Dźvie dyvizii na takoj vialikaj terytoryi — heta nie dla ataki, heta linija abarony».
***
Sioleta ŭ studzieni Rasieja abviaściła ab farmiravańni troch novych voinskich padraździaleńniaŭ na zachodnim napramku ŭ hetym hodzie, jakija buduć asnaščany piaćciu stratehičnymi rakietnymi pałkami ź jadziernymi rakietami na bajavym dziažurstvie. Ministar abarony Rasiei Siarhiej Šajhu abjaviŭ pra heta 12 studzienia.
Šajhu zajaŭlaŭ, što nieabchodna budzie taksama palepšyć infrastrukturu, jakaja padtrymlivaje jadziernyja siły Rasiei, majučy na ŭvazie takija abjekty, dzie hruntujucca stratehičnyja rakietnyja padvodnyja łodki i bambaviki dalokaha radyjusu dziejańnia.
Zachodnija ŚMI paviedamlali, što Maskva abviaściła ab naroščvańni vajennaj mocy na zachodnim kirunku paśla taho, jak adnosiny Maskvy z Zachadam pahoršylisia da minimumaŭ, nia bačnych z časoŭ chałodnaj vajny.
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ20
Kamientary