Bolš jak 12 młn jeŭra vydzielić Jeŭrasajuz dla pierachodu da madeli «zialonaj ekanomiki» ŭ Biełarusi. Ab hetym paviedamiła pieršy namieśnik ministra pryrodnych resursaŭ i achovy navakolnaha asiarodździa Ija Małkina na pres-kanfierencyi «Dziaržaŭnaja ekałahičnaja palityka: ukaranieńnie miechanizmaŭ «zialonaj ekanomiki».
«Siońnia Minpryrody realizuje niekalki prajektaŭ mižnarodnaj techničnaj dapamohi, finansujemych Jeŭrapiejskim sajuzam, jakija daduć mahčymaść vypracavać napramki i kankretnyja kroki pa pierachodzie da madeli «zialonaj ekanomiki», — skazała jana. U pryvatnaści, pieršy namieśnik ministra nazvała prajekt «Techničnaja dapamoha dla padtrymki raźvićcia «zialonaj ekanomiki» ŭ Respublicy Biełaruś» i prajekt «Sadziejničańnie pierachodu Respubliki Biełaruś da «zialonaj ekanomiki».
Pavodle jaje słoŭ, «u ramkach prajektaŭ analizujecca jeŭrapiejskaje i nacyjanalnaje zakanadaŭstva ŭ halinie dziaržaŭnych zialonych zakupak, ekałahičnaj markiroŭki pradukcyi, arhaničnaj sielskaj haspadarki, ekałahičnych inavacyj i ekasistemnych pasłuh».
«Niahledziačy na toje, što prajekty pačali rabotu tolki ŭ 2015 hodzie, užo jość kankretnyja napracoŭki i ich realizacyja. U pryvatnaści, nabyty pieršyja turystyčnyja elektryčnyja aŭtobusy, jakija buduć kursiravać pa terytoryi respublikanskaha łandšaftnaha zakaźnika «Śviciazianski» i Niaśvižskaha pałacava-parkavaha kompleksu Radziviłaŭ. Na bazie respublikanskaha łandšaftnaha zakaźnika «Nalibocki» zavieršana budaŭnictva hadavalnika dla štučnaj hadoŭli ptušak ciecierukovych vidaŭ u metach dalejšaj ich realizacyi inšym asabliva achoŭnym pryrodnym terytoryjam i za miažu. A na Papiarovaj fabrycy Dziaržznaka ŭ Barysavie pačaty inavacyjny dla Biełarusi prajekt pa vytvorčaści ofisnaj papiery z druhasnych resursaŭ», — paviedamiła Ija Małkina.
Pieršy namieśnik ministra skazała, što ŭ Biełarusi ŭ 2015 hodzie byŭ praviedzieny konkurs inicyjatyŭ siarod niaŭradavych arhanizacyj pa realizacyi zialonych piłotnych prajektaŭ. Ciapier realizujecca 16 takich inicyjatyŭ pa roznych napramkach, u tym liku ekałahičny turyzm, zachavańnie bijaraznastajnaści, ustojlivaje vykarystańnie bijałahičnych resursaŭ i ziamiel, abychodžańnie z adchodami, pašyreńnie vykarystańnia adnaŭlalnych krynic enierhii i enierhaefiektyŭnaść.
Vyniki hetych inicyjatyŭ dapamohuć Minpryrody vypracavać kančatkovy kurs raźvićcia i vyznačyć pryjarytetnyja napramki pa azielanieńni ekanomiki. «Ekałohija — heta nie zatraty, heta inviestycyi ŭ budučyniu», — padkreśliła pieršy namieśnik ministra. Usiaho na realizacyju prajektaŭ Jeŭrapiejskim sajuzam budzie vydzielena bolš jak 12 młn jeŭra.
Kamientary