Minpryrody i NANB abviarhajuć infarmacyju ab skaračeńni papulacyi miadźviedziaŭ u Biełarusi
Ministerstva pryrodnych resursaŭ i achovy navakolnaha asiarodździa i Nacyjanalnaja akademija navuk abviarhajuć infarmacyju sa spasyłkaj na Biełstat ab tym, što papulacyja miadźviedziaŭ u krainie skaraciłasia ŭ šeść razoŭ, da 20 asobin.
Jak paviedamiŭ 27 červienia na pres-kanfierencyi ŭ Minsku hienieralny dyrektar Navukova-praktyčnaha centra pa bijaresursach Aleh Baradzin, na terytoryi respubliki pražyvaje ad 90 da 120 miadźviedziaŭ.
«Treba ŭličvać bijałohiju hetaha vidu žyvioł, jakija mohuć mihravać na vielmi vialikija adlehłaści, — skazaŭ jon. — Časam sprabujuć śpiekulavać takoj infarmacyjaj, ale, kali b papulacyja pamienšała, heta było b zaŭvažana, adpaviednyja słužby imhnienna adreahavali b».
Načalnik upraŭleńnia bijałahičnaj i łandšaftnaj raznastajnaści Ministerstva pryrodnych resursaŭ i achovy navakolnaha asiarodździa Natalla Minčanka paviedamiła, što Minpryrody analizavała statystyčnyja dadzienyja Minlashasa, jakija viedamstva padało ŭ Biełstat, i źviarnuła ŭvahu na toje, što «heta ličby nie pra kolkaść miadźviedziaŭ, heta dadzienyja karystalnikaŭ palaŭničych uhodździaŭ pa statystyčnaj spravazdačnasci ab palavańni».
Pavodle jaje słoŭ, Minpryrody razhladała hetaje pytańnie z usimi zacikaŭlenymi viedamstvami, u tym liku pry ŭdziele Dziaržaŭnaj inśpiekcyi, Minlashasa, Akademii navuk i inšych, a taksama praviało pasiadžeńnie kaardynacyjnaha savieta pa bijaraznastajnaści.
«My pryjšli da vysnovy, što dadzienyja karystalnikaŭ palaŭničych uhodździaŭ, jakija jany padajuć u statspravazdačnaści, niedakładnyja i patrabujuć dadatkovaha vyvučeńnia i karekciroŭki», — skazała Minčanka. Pradstaŭnik ministerstva dadała, što sama forma statspravazdačnaści jak asnoŭny mietad uliku, jaki ŭjaŭlaje saboj ankietu-apytalnik, patrabuje karekciroŭki.
Jana padkreśliła, što za vidy žyvioł, uklučanych u Čyrvonuju knihu, adkazvajuć akademija navuk i Minpryrody i tolki ŭ hetych viedamstvaŭ mohuć być dakładnyja dadzienyja.
Pradstaŭnik viedamstva paviedamiła, što pry padtrymcy NANB, Navukova-praktyčnaha centra pa bijaresursach ciapier raspracoŭvajecca novaja viersija dziaržaŭnaha kadastru žyviolnaha i raślinnaha śvietu. Heta budzie novaja baza ŭ sistemie anłajn, dzie kožny žadajučy zmoža atrymać infarmacyju pra kolkaść vidaŭ, jakija žyvuć u Biełarusi. Pieršapačatkovy varyjant takoj anłajn-bazy źjavicca na praciahu najbližejšych miesiacaŭ. Infarmacyja ŭ bazie budzie pastajanna papaŭniacca.
«A ź Minlashasam my budziem pracavać nad źmianieńniem formy statspravazdačnaści, kab nie ŭvodzić usiu krainu ŭ zman, jak u situacyi ź miadźviedziami», — zajaviła Minčanka.
Kamientary