Minčuk patrapiŭ pad abstreł u Nicy: «Biełaruskaja ambasada i MZS praihnaravali, «Biełavija» skazała płacić štraf»
Minčuk Arkadź Azoŭ, miarkujučy pa ŭsim, razam ź siamjoj patrapiŭ pad abstreł u Nicy.
Nočču jon sprabavaŭ źviazacca ź biełaruskaj ambasadaj, kab atrymać peŭnuju dapamohu.
Što z hetaha vyjšła, jon apisaŭ na svajoj staroncy ŭ fejsbuku:
«Učora trapili pad abstreł u Nicy kala 22:30. Pačuli streły, i natoŭp pabieh (była panika). Žonka ŭpała, ja ź dziciem na rukach.
Biehli kala chviliny i ŭvieś čas čuli streły zzadu, jak byccam terarysty iduć i stralajuć. Schavalisia ŭ haścinicy. Tam dali vadu, koŭdru, paduški. Aŭstryjcy puścili dziciaci ź cieščaj u numar paspać. U try hadziny nočy ŭsich biaspłatna raźvieźli pa damach.
Patelefanavali ŭ dźvie nočy ŭ naša biełaruskaje pasolstva ŭ Paryžy: dziažurny skazaŭ, što źviažacca z konsułam i pieratelefanavaŭ praz 5 chvilin (žonka papraŭlaje: dziažurny paprasiŭ nas jamu pieratelefanavać i jašče nie braŭ słuchaŭku dva razy). Adkaz: «Ničym vam nie možam dapamahčy, bo ŭ Nicy niama pradstaŭnictva. Vybirajciesia sami». Z ambasady tak nichto nie pieratelefanavaŭ i nie pacikaviŭsia, u jakim my stanie i dzie znachodzimsia. Ambasada Biełarusi adpačyvała. Ranicaj u žonki i cieščy zdaryłasia isteryka.
Pazvanili ŭ MZS (teł. 2327292). Sakratarka skazała, što złučaje z adździełam pa nadzvyčajnych situacyjach, ale za try chviliny my tak ni z kim i nie pahavaryli. I nichto nie pieratelefanavaŭ. Prykładna ŭ 11:00 chacieli pamianiać kvitki ŭ «Biełavii» (teł. 2202555), apisali situacyju. Nam skazali, što treba apłacić štraf za pieranos daty kvitkoŭ. Skončylisia hrošy na troch telefonach vełkom. Svajaki ŭ Minsku napisali zajavu ŭ «Biełavija» i tolki ŭ paniadziełak skažuć, ci mahčymy pieranos. Rasijanie skuplajuć kvitki i ŭ paniadziełak, dumaju, miescaŭ užo nie budzie.
Dziakuj aŭstryjcu, jaki puściŭ dziciaci zanačavać. Dziakuj piersanału hatela. I asobnaje «fie» našym biełaruskim słužbam.
Bolš čerstvaha staŭleńnia da svaich suajčyńnikaŭ, jakija trapili ŭ biadu, ad našych čynoŭnikaŭ my nie sustrakali».
«Naša Niva» dazvaniłasia ŭ biełaruskaje MZS z pytańniem, ci mahło takoje być.
Tam vypadak nie abvierhli i nie paćvierdzili. Skazali tolki, što ŭ ich užo jość damova z «Biełavijaj», jakaja nie budzie spahaniać štraf za abmien kvitkoŭ u suviazi z teraktam.
Ina Kulej: Milinkievič pieramoh śmierć, ale šlach da poŭnaha adužańnia niablizki4
Kamientary