Kiraŭnik Dziarždepu ZŠA Džon Kery pahutaryŭ pa telefonie z kiraŭnikom tureckaha MZS Mieŭlutam Čavušahłu i adkinuŭ zajavy pra toje, što ZŠA datyčnyja da sproby pieravarotu ŭ Turcyi, paviedamlaje Reuters sa spasyłkaj na pradstaŭnika amierykanskaha viedamstva Džona Kirbi.
«Jon [Kery] daŭ zrazumieć, što ZŠA chacieli b akazać dapamohu tureckim uładam u praviadzieńni rasśledavańnia i što publičnyja insinuacyi i śćviardžeńni ab roli ZŠA ŭ sprobie pieravarotu, jakaja pravaliłasia, absalutna niasłušnyja i škodnyja dla dvuchbakovych adnosinaŭ», - skazaŭ Kirbi.
Kery zaklikaŭ Turcyju być strymanaj i pavažać viaršenstva prava ŭ rasśledavańni zmovy, adznačyŭ pradstaŭnik Dziarždepu.
Prezident Turcyi Redžep Taip Erdahan raniej zajaŭlaŭ, što natchnialnikam buntu staŭ Fietchuła Hiulen, turecki piśmieńnik, były imam i prapaviednik, isłamski hramadski dziejač, jaki pražyvaje ŭ dobraachvotnym vyhnańni ŭ Sejłarsburhu, štat Piensilvanija, ZŠA. Kiraŭnik tureckaj dziaržavy adznačaŭ, što vykanaŭcy pieravarotu atrymlivali zahady ź Piensilvanii, a paźniej zaklikaŭ prezidenta ZŠA albo departavać Hiulena, albo vydać jaho Turcyi.
Jak piša Bloomberg, ministr pracy Sulejman Sojle pajšoŭ dalej, zajaviŭšy, što ZŠA «stajać za pieravarotam» da taho času, pakul pradastaŭlajuć Hiulenu prytułak.
Sam Hiulen svaju datyčnaść da pieravarotu admaŭlaje. U intervju, dadzienym žurnalistam ź Piensilvanii, jon zajaviŭ, što miaciež moža być «insceniroŭkaj».
Čavušahłu raniej zajaŭlaŭ, što da sproby pieravarotu datyčnyja vajskoŭcy z avijabazy NATA ŭ Turcyi Indžyrlik, jakaja vykarystoŭvajecca ZŠA dla naniasieńnia udaraŭ pa «isłamskaj dziaržavie».
Kamientary