Zhodna sa źviestkami aficyjnaj statystyki, za studzień—maj ekspart biełaruskich naftapraduktaŭ u Rasiju skłaŭ 161 tys. ton. Za studzień—krasavik na rasijski rynak było adhružana 156,1 tys. ton. Takim čynam, u mai pastaŭki skłali ŭsiaho 4,9 tys. ton.
U hrašovym vyražeńni ekspart biełaruskich naftapraduktaŭ u Rasiju skłaŭsia za studzień—maj na ŭzroŭni 51,2 młn. dołaraŭ i pavialičyŭsia za maj usiaho na 2,5 młn. dołaraŭ.
Nahadajem, u červieni rasijski bok abviaściŭ pra rašeńnie skaracić pastaŭki nafty ŭ Biełaruś. «My zychodzim z taho, što hrafik pastavak nafty na treci kvartał u Biełaruś budzie nižejšy, čym mierkavałasia, — zajaviŭ žurnalistam ministr enierhietyki RF Alaksandr Novak. — Heta źviazanaje z dvuma faktarami: nieapłataj za pastaŭleny haz «Hazpromu» i niepastupleńniem dachodaŭ u biudžet u suviazi z hetym, druhi faktar — heta niedapastaŭki naftapraduktaŭ ź biełaruskich NPZ u Rasiju».
Varta adznačyć, što raniej Biełaruś i Rasija damovilisia ab tym, što biełaruskija zavody pastaviać na rasijski rynak miljon ton bienzinaŭ ŭ 2016 hodzie. Adnak u pačatku lutaha vice-premjer Biełarusi Uładzimir Siamaška zajaviŭ, što ŭ hetym hodzie Biełarusi niavyhadna pradavać bienzin Rasii, tamu biełaruski bok skaraciŭ pastaŭki naftapraduktaŭ na rasijski rynak. «Dla nas pastaŭlać siońnia bienzin u Rasiju — pracavać hłyboka ŭ stratu», — skazaŭ Siamaška.
Roznahałośsi pamiž Biełaruśsiu i Rasijaj paŭstali nie tolki pa pytańni umoŭ pastavak naftapraduktaŭ, ale i koštu rasijskaha hazu. Biełaruski bok zajaŭlaŭ, što ŭ suviazi z asłableńniem kursu rasijskaha rubla košt hazu dla Biełarusi ŭ dołaravym vyražeńni pavinien być źnižany. Rasijski ŭrad nie zhodny z takoj pazicyjaj, ale, niahledziačy na heta, Biełaruś stała raźličvacca za haz pa nižejšaj canie ŭ dołaravym vyražeńni. U vyniku, zhodna sa źviestkami «Hazproma», blizu kanca maja ŭtvaryłasia zapazyčanaść Biełarusi za haz ŭ 250 młn. dołaraŭ.
Kamientary