Erdahan ŭvioŭ u Turcyi režym nadzvyčajnaha stanovišča i dapuściŭ uznaŭleńnie śmiarotnaha pakarańnia ŭ krainie
U intervju katarskamu telekanału Al Jazeera kiraŭnik tureckaj dziaržavy paviedamiŭ, što paśla sproby vajennaha pieravarotu ŭ Turcyi režym nadzvyčajnaha stanovišča uviedzieny na try miesiacy.
«Členy Savieta biaśpieki vyrašyli rekamiendavać uradu abjavić nadzvyčajnaje stanovišča na try miesiacy, kab mieć mahčymaść chutka adkazvać na dziejańni raznastajnych terarystyčnych arhanizacyj», — cytuje telekanał słovy Erdahana.
Erdahan taksama zajaviŭ, što, na jaho dumku, niekatoryja zamiežnyja krainy byli źviazany sa sprobaj dziaržaŭnaha pieravarotu. Jon nie patłumačyŭ, jakija mienavita dziaržavy jon padazraje ŭ datyčnaści da pieravarotu, paviedamlaje ahienctva Reuters.
U hetym ža intervju Erdahan paćvierdziŭ zatrymańnie piłotaŭ, jakija źbili rasijski Su-24 nad miažoj ź Siryjaj. Pavodle jaho słoŭ, jany byli źviazany z prapaviednikam Hiulenam, jakoha aficyjnyja ŭłady abvinavačvajuć u arhanizacyi putču.
«My jašče nie viedajem pra datyčnaść hetaj padziei ci hetych ludziej. Adnak hetyja piłoty mohuć być źviazanyja ź Piensilvanijaj (Hiulen pražyvaje ŭ štacie Piensilvanija, ZŠA). Jany ciapier znachodziacca pad vartaj, kančatkovy adkaz daść sud. Budzie zroblena zaklučeńnie pra toje, ci datyčnyja jany da dadzienaj hrupy», — skazaŭ Erdahan.
Turecki prezident taksama paviedamiŭ, što padpiša dekret ab śmiarotnym pakarańni ŭdzielnikam pieravarotu, kali takoje rašeńnie prymie parłamient krainy. Na pytańnie ab tym, jak pastavicca da hetaha ES, Erdahan paviedamiŭ, što «Jeŭrasajuz — heta nie ŭvieś śviet». Pavodle jaho słoŭ, Turcyja 53 hady damahałasia členstva ŭ ES, ale tak hetaha i nie damahłasia. Jak ličyć Erdahan, jeŭrapiejcy nie majuć prava krytykavać nadzvyčajnaje stanovišča ŭ krainie.
Pry hetym turecki prezident padkreśliŭ, što Turcyja zastaniecca demakratyčnaj krainaj i nie źbirajecca adstupać ad hetaha.
Datyčna pryčyn pieravarotu Erdahan upiknuŭ raźviedsłužby, jakija niedapracavali i nie zdoleli praduchilić sproby putču.
Raniej tureckija ŭłady paviedamili pra toje, što piłot tureckaha źniščalnika, jaki źbiŭ rasijski samalot, byŭ adnym z udzielnikaŭ sproby dziaržaŭnaha pieravarotu ŭ Turcyi, jakaja adbyłasia ŭ noč na 16 lipienia. Pa słovach mera Ankary Mielicha Hiekčecha, mienavita taja «paralelnaja struktura» va Uzbrojenych siłach, jakaja zładziła miaciež, była adkaznaja za paharšeńnie adnosin z Rasijaj.
Ciapier čytajuć
Połk Kalinoŭskaha paviedamiŭ pra hibiel troch bajcoŭ3
Kamientary