Litva nakiravała Biełarusi notu z zapytam pra vyniki rasśledavańnia incydentu na AES

Litva nakiravała Biełarusi čarhovuju notu, u jakoj zapytvaje vyniki rasśledavańnia niadaŭniaha incydentu na AES, jakaja budujecca, paviedamlajecca na sajcie litoŭskaha MZS.

28 lipienia ŭ ministerstva była vyklikanaja časovaja pavieranaja ŭ spravach Biełarusi ŭ Litvie Ludmiła Tatarynovič. Joj uručyli notu i paprasili «jak maha chutčej padać padrabiaznuju infarmacyju ab trecim incydencie, što, jak miarkujecca, adbyŭsia pry budaŭnictvie Astravieckaj atamnaj elektrastancyi».

Dypłamatyčnyja miery, adznačyli ŭ MZS Litvy, byli pryniatyja paśla taho, jak biełaruskaja presa apublikavała infarmacyju pra incydent, jaki zdaryŭsia 10 lipienia na Biełaruskaj AES i padčas jakoha, vierahodna, byŭ paškodžany korpus atamnaha reaktara. «Hety incydent razhladajecca Litvoj jak asabliva niebiaśpiečny i zdolny vyklikać niezvarotnyja admoŭnyja nastupstvy dla biaśpieki AES, što budujecca», — havorycca ŭ paviedamleńni.

Akramia taho, u nocie Litva prapanuje Biełarusi zasnavać mižnarodnuju kamisiju ekśpiertaŭ dla analizu vynikaŭ hetaha rasśledavańnia i davańnia rekamiendacyj, a taksama vykazvaje zaniepakojenaść adnosna prazrystaści prajekta BiełAES, niedachopu kultury biaśpieki i nieadpaviednaści mižnarodnym standartam pa atamnaj biaśpiecy i achovie navakolnaha asiarodździa, niedastatkovaj roli rehulatara jadziernaj biaśpieki Biełarusi i hienieralnaha padradčyka budaŭnictva pry arhanizacyi biaśpieki budaŭničych rabot.

«Biełaruś jašče raz zaklikanaja zaprasić niezaležnych mižnarodnych ekśpiertaŭ u metach acenki prydatnaści placoŭki Astravieckaj AES, budaŭničych rabot i ich jakaści», — paviedamlajuć u źniešniepalityčnym viedamstvie susiedniaj dziaržavy.

Akramia taho, paviedamlajecca, što ministry zamiežnych spraŭ, enierhietyki i navakolnaha asiarodździa Litvy nakiravali list namieśniku staršyni Jeŭrakamisii Marašu Šafčoviču i kamisaru pa enierhietycy Aryjasu Kańjete, u jakim prainfarmavali pra incydent i paprasili aktyŭnaha ŭmiašańnia ES u vyrašeńnie pytańnia jadziernaj biaśpieki, važnaha dla ŭsiaho rehijona.

Ministr zamiežnych spraŭ Litvy Linas Linkiavičus taksama źviarnuŭsia ź listom da hienieralnaha sakratara MAHATE Jukija Amana, u jakim padkreśliŭ važnuju rolu hetaj arhanizacyi ŭ zachavańni jadziernaj biaśpieki padčas ažyćciaŭleńnia Biełaruśsiu prajekta AES, a taksama paprasiŭ ahienctva ŭdzielničać u rasśledavańni incydentaŭ.

• 0
• 0
• 0
• 0
• 0
• 0
• 0
• 0