27 žniŭnia ŭ staradaŭnim šlachieckim falvarku Rodzievičy, što za 5 km ad Halšanskaha zamka, adbudziecca prezientacyja Parka minijaciur zamkaŭ Vialikaha Kniastva Litoŭskaha. Padčas prezientacyi haściam fondu «Kraina zamkaŭ» buduć pradstaŭleny kancepcyja parka, niekalki minijaciur, a taksama 3D-drukarki, na jakich drukujucca makiety zamkaŭ. U prezientacyi voźmuć udzieł dziejačy kultury: muzyka Źmicier Vajciuškievič, teatralny režysior Valeryj Mazynski.
«Naš prajekt chutka možna budzie nazyvać narodnym, - kaža dyrektar fondu «Kraina zamkaŭ» Aleś Varykiš. - Na siońniašni dzień u im uziali ŭdzieł kala 100 čałaviek nie tolki ź Biełarusi, ale ź Niamieččyny, Izraila, Rasii, Polščy. Siarod ich achviaradaŭcy, vałanciory. Ludzi nie tolki pieraličvajuć nam hrošy na nabyćcio dadatkovych 3D-drukarak, ale i aktyŭna prapanujuć roznuju dapamohu - ad zboru kamianioŭ na ŭčastku da stvareńnia ZD-makietaŭ i druku madelaŭ na ŭłasnych drukarkach».
Na siońniašni dzień na prezientacyju zapisałasia bolš za 100 čałaviek. Dla ich budzie arhanizavanaja ekskursija pa najbolš značnych abjektach rehijona, paśla jakoj budzie pradstaŭleny Park minijaciur. Zavieršycca prahrama śviatočnaj viečarynaj z majstar-kłasami pa staradaŭnich tancach i pieśniach. Zapisacca na ekskursiju-prezientacyju možna ŭ fondzie «Kraina zamkaŭ».
Ab stvareńni Parku minijaciur zamkaŭ i chramaŭ było zajaŭlena ŭ kancy minułaha hoda. Ideja była padtrymana ŭ ramkach prajekta ES / PRAAN «Sadziejničańnie raźvićciu na miascovym uzroŭni ŭ Respublicy Biełaruś». Svaje srodki ŭ budaŭnictva parku ŭkładvaje i «Kraina zamkaŭ». Inviestycyi ŭ abjekt užo pieravysili 300 młn niedaminavanych rubloŭ. Na hetyja hrošy byŭ nabyty pieršy 3D-prynter, materyjały dla druku minijaciur, stvorana niekalki virtualnych madelaŭ zamkaŭ i chramaŭ, praviedzieny ziamielnyja raboty na terytoryi parku.
A 20 lipienia na płatformie Talaka.by startavała kampanija pa zbory srodkaŭ na nabyćcio dvuch dadatkovych, bolš mahutnych 3D-drukarak, kožnaja ź jakich kaštuje kala 2,5 tys. dalaraŭ. Ich zadača - paskoryć praces druku minijaciur. Usiaho ŭ miežach kampanii płanujecca sabrać 11 016 rub. U ciapierašni čas sabrana 64% srodkaŭ.
Aficyjnaje adkryćcio parku zapłanavana na maj-červień 2017 hoda. Pieršyja dziesiać madelaŭ pavinny źjavicca ŭ parku ŭžo da kanca hetaha hoda.
Ciapier čytajuć
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary