Administracyja prezydenta vyvučaje nastroi studentaŭ

U redakcyju «Našaj Nivy» patrapiła ankieta pad nazvaj «Mierkavańnie studentaŭ pra VNU i roznyja aspekty svajho žyćcia». Na vokładcy paznačana, što raspracavanaja jana ŭ traŭni 2008 h. Infarmacyjna‑analityčnym centram pry Administracyi prezydenta. Ankietu hetuju nibyta raspaŭsiudžvali siarod studentaŭ adnaho ź mienskich VNU

Apytanka prapanuje adkazać na 76 pytańniaŭ. Siarod ich traplajucca, jak datyčnyja vyklučna žyćcia studentaŭ, hetak i aspektaŭ hramadzka‑palityčnaha žyćcia ‑‑ udzieł u budučych parlamenckich i prezydenckich vybarach, staŭleńnie da movy i h.d. Tak, studentaŭ prosiać adkazać, za jakoha kandydata jany hatovyja prahałasavać na bližejšych parlamenckich vybarach, a taksama na prezydenckich — u vypadku, kali b jany adbylisia zaŭtra.

Varta adznačyć, što siarod varyjantaŭ adkazaŭ znajšłosia miesca dla apazycyjnych kandydataŭ uvohule (vybary ŭ parlament), i dla Alaksandra Milinkieviča z Alaksandram Kazulinym (vybary prezydenta). Akramia taho respandentam prapanujecca acanić rolu apazycyi ŭ našym hramadztvie dy adkazać na pytańnie, idei i prahramy jakich palityčnych partyjaŭ najbolš im impanujuć (u śpisie prysutničajuć usie viadomyja apazycyjnyja partyi).

Pytańnie №24 maje na mecie vyśvietlić, ci ličyć siońniašniaje studenctva dastatkovaj uvahu dziaržavy da raźvićcia nacyjanalnaj kultury. Nastupnaje pa liku pytańnie datyčyć biełaruskaj movy — «Ci zadavalniaje Vas isny stan biełaruskaj movy ŭ respublicy?». Asobnaje pytańnie vyśviatlaje stupień dačynieńnia studentaŭ da BRSM.

Respandentam taksama prapanujecca addać sympatyi histaryčnym dziejačam (nia bolš, čym trom), siarod jakich nazyvajucca kniaź Vitaŭt, Kastuś Kalinoŭski, Tadevuš Kaściuška, Vacłaŭ Haveł, ale j Iosif Stalin, Piotar I, Jury Andropaŭ. Idealnaha palityka siarod zamiežnych dziejačoŭ prapanujecca pašukać siarod takich asobaŭ, jak Uha Čavesa, Fidela Kastra, Nursułtana Nazarbajeva, Chiłary Klintan dy inšych.

Mižnarodnuju tematyku praciahvaje pytańnie pra toje, što najbolš niepakoić sučasnaha studenta ŭ śviecie. Heta j napružanaść u adnosinach Biełarusi z krainami Eŭraźviazu, i sankcyi ZŠA suprać «Biełnaftachimu», i prablemy ŭ dačynieńniach z Rasiejaj, a taksama nieprychavanaja ahresiŭnaść źniešniaj palityki ZŠA ŭ dačynieńni Biełarusi dy inšych krainaŭ, jakaja ŭvieś čas raście.

Źviartaje ŭvahu na siabie šerah pytańniaŭ, pryśviečanych abaviazkovamu raźmierkavańniu vypusknikoŭ VNU. Adno ź ich maje vyśvietlić, ci viedajuć uvohule budučyja specyjalisty pra finansavuju adkaznaść za niajaŭku na miesca raźmierkavańnia.

Asobnym blokam iduć pytańni, datyčnyja ŚMI, jakim apytanyja addajuć pieravahu. Siarod drukavanych vydańniaŭ prapanujucca na vybar nia tolki dziaržaŭnyja, a siarod telekanałaŭ — taksama polskija i litoŭskija.

Padsumoŭvajučy, možna adznačyć, što tematyka i padbor pytańniaŭ robiać nadzvyčaj cikavymi vyniki apytańnia. Zastajecca tolki ŭłasna pytańnie, ci buduć jany apublikavanyja i dastupnyja hramadztvu.

Siamion Piečanko

• 0
• 0
• 0
• 0
• 0
• 0
• 0
• 0