Kampanii Juryja Čyža pradali hipiermarkiet i handlovy centr za $104 miljony, stali viadomyja padrabiaznaści
Akramia taho, za $28 młn treci raz zakładzieny «Prastor» u Malinaŭcy.
Za apošnija try miesiacy ŭ Minsku byli zaklučanyja niekalki bujnych uhodaŭ pa prodažy znakavych abjektaŭ, jakija raniej naležali Juryja Čyžu.
Na ich źviarnuŭ uvahu «Ježiednievnik».
Pavodle źviestak Śledčaha kamiteta, biznesmienu i jaho kampańjonam inkryminujecca ŭchileńnie ad spłaty padatkaŭ, što naniesła dziaržavie škodu ŭ pamiery kala $12 miljonaŭ. Adnak košt pradadzienych abjektaŭ u razy pieravyšaje nanasienyja straty.
Takim čynam, kamu ciapier naležać hipiermarkiety Juryja Čyža? Raniej u jaho biznes-impieryi było piać kramaŭ «Prastor».
«Prastor» na Kamiennahorskaj dastaŭsia «BPS-Śbierbanku»
Heta byŭ adzin z najnoŭšych markietaŭ Juryja Čyža.
U kancy lipienia kampanija «Prastor-Trejd» pradała hety handlovy centr. Jak stała viadoma «Našaj Nivie», novym ułaśnikam staŭ «BPS-Śbierbank».
Bank nabyŭ tut dva vialikija abjekty.
Handlovy centr płoščaj kala 23 tysiač kvadratnych mietraŭ kaštavaŭ 40,4 miljona novych rubloŭ (amal $21 miljon u ekvivalencie).
Aproč taho, bank staŭ haspadarom šmatuzroŭnievaha parkinha płoščaj bolš za 18 tysiač kvadratnych mietraŭ. Jahonaja cana — kala 15,3 miljona novych rubloŭ (kala $8 miljonaŭ).
Jašče niekalki dapamožnych zbudavańniaŭ pierajšli «BPS-Śbierbanku» častkova (33%). Rešta doli zastajecca ŭ «Prastor-Trejda», ale zakładzienaja ŭ tym ža banku.
«Prastor» u Malinaŭcy trojčy pierazakładzieny
Samy stary hipiermarkiet pa adrasie Dziaržynskaha, 126 byŭ pabudavany jašče ŭ siaredzinie 2000-ch i farmalna byŭ zarehistravany na kampaniju «PrastorMarkiet».
Kali viasnoj 2013 hoda Juryju Čyžu spatrebilisia hrošy, jon źviarnuŭsia ŭ «BPS-Śbierbank». Biznesmien atrymaŭ $31 miljon, zakłaŭšy handlovy centr. Hrošy jon musiŭ viarnuć na praciahu dziesiaci hadoŭ.
U kancy 2015 hoda Čyž atrymaŭ ad banka jašče kala $1 miljona ŭ ekvivalencie, abiacaŭšy raźličycca za paŭhoda.
Narešcie, u lipieni 2016 była aformlenaja treciaja pa liku zastava — 55 miljonaŭ novych rubloŭ (kala $28 miljonaŭ u ekvivalencie). Hrošy treba viartać na praciahu dziesiaci hadoŭ pad staŭku refinansavańnia + 0,6 pracentnaha punkta. U hetuju damovu ŭklučanyja jašče niekalki dapamožnych zbudavańniaŭ hipiermarkieta na Kamiennahorskaj.
«Arena-Sici» dastaŭsia «Biełahraprambanku»
Handlovy centr na praśpiekcie Pieramožcaŭ, 84 tym časam adyšoŭ inšamu banku. U červieni 2016 hoda haspadarom staŭ «Biełahraprambank».
Asnoŭnaje pamiaškańnie handlovaha centra (kala 78 tysiač kvadratnych mietraŭ), kafe, kinateatr… — usio heta išło ŭ adnym fłakonie i kaštavała kala $75 miljonaŭ, pryčym uhoda zaklučałasia ŭ valucie.
«Prastory» ŭ Čyžoŭcy i Šabanach adyšli «Biełarusbanku»
Narešcie, hipiermarkiety pa adrasie Ubareviča, 176 i Partyzanski praśpiekt, 182 Juryj Čyž addaŭ pad zastavu jašče ŭ kancy 2014 hoda. Ciapier budynki naležać lizinhavaj kampanii «Biełarusbanka».
Za kramy Čyž atrymaŭ $61,2 miljona. Hrošy možna viarnuć banku da 2022 hoda, i tolki ŭ takim vypadku multymiljanier atrymaje hetuju majomaść nazad.
Kamientary