Za śmierć źbitaha viaźnia SIZA Pcičkina ŭ sudzie adkazvaje fielčar
Maskoŭskim sudzie pačynajecca praces, jakoha paciarpiełyja i hramadzkaść damahalisia z 2013 hodu.
16 vieraśnia ŭ Maskoŭskim rajonnym sudzie Miensku buduć sudzić felčara «Vaładarki» Kryłova, jakomu prakuratura vystaviła abvinavačańnie ŭ nienaležnym vykanańni słužbovych abaviazkaŭ, što pryviało da śmierci viaźnia izalatara Ihara Pcičkina.
Trahičnaja historyja adbyłasia ŭ pačatku žniŭnia 2013 hodu. U SIZA numar 1 na vulicy Vaładarskaha ŭ Miensku ŭsiaho praź niekalki dzion adbyćcia aryštu za vadžeńnie aŭtamabila biez pravoŭ pamior małady miančuk Ihar Pcičkin. Administracyja ŭstanovy spačatku zajaviła, što śmierć viaźnia nastupiła ad chvaroby serca, potym pryznała, što ŭ dačynieńni da Ihara Pcičkina byli ŭžytyja specsrodki, ale nibyta ŭ miežach zakonu, a pamior viazień nibyta tamu, što byŭ narkamanam i nia vytrymaŭ ustrymańnia ad narkotykaŭ.
Svajaki Ihara Pcičkina try hady dakazvali, što jahonaja śmierć mahła być hvałtoŭnaj. Rodnyja damahlisia ekshumacyi cieła pamierłaha i ekspertyzy, jakaja paćvierdziła najaŭnaść na ciele śladoŭ hvałtoŭnaha ŭździejańnia. Taksama ekspertyza nie znajšła ŭ ciele Ihara Pcičkina śladoŭ užyvańnia narkatyčnych srodkaŭ. Za toje, kab pryčyny śmierci Ihara Pcičkina byli daskanała raśśledavanyja, zmahalisia taksama biełaruskija pravaabaroncy dy pradstaŭniki hramadzkaści. Hetak, pad murami «Vaładarki» ŭ vieraśni 2013 hodu prajšoŭ niesankcyjanavany pikiet, jaki skončyŭsia zatrymańniami i aryštami, u tym liku žurnalistaŭ.
Uletku 2016 hodu stała viadoma, što prakuratura Biełarusi pieradała ŭ Maskoŭski sud kryminalnuju spravu suprać felčara «Vaładarki» A. Kryłova, jaki dziažuryŭ u dzień śmierci Ihara Pcičkina. Felčar nibyta nie nadaŭ viaźniu naležnuju medyčnuju dapamohu, i heta pryviało da śmierci Ihara Pcičkina, ličać u prakuratury. Miž tym u zaviadzieńni kryminalnaj spravy na achoŭnikaŭ «Vaładarki», jakija ŭžyvali adnosna Ihara Pcičkina fizyčnuju siłu, prakuratura dahetul admaŭlaje.
«Vyjavić pachodžańnie cialesnych paškodžańniaŭ jak u chodzie raśśledavańnia kryminalnaj spravy, tak i pry praviadzieńni pravierki pa vyłučanych materyjałach, nie ŭjaŭlajecca mahčymym», — paviedamili maci pamierłaha Žanie Pcičkinaj z Maskoŭskaha RUUS Miensku, dzie pravodzili čarhovuju pravierku śmierci viaźnia.
Žanna Pcičkina i pravaabaroncy praciahvajuć damahacca pryciahnieńnia da kryminalnaj adkaznaści supracoŭnikaŭ mienskaha SIZA.
Kamientary