U sudzie nad Eduardam Palčysam abvieščany pierapynak pa 24 kastryčnika
U sudzie nad błohieram Eduardam Palčysam abvieščany pierapynak da 10.00 24 kastryčnika, paviedamiŭ sustaršynia arhkamiteta pa stvareńni partyi «Biełaruskaja chryścijanskaja demakratyja» Pavieł Sieviaryniec. Praces prachodzić u Minskim haradskim sudzie ŭ zakrytym režymie.
Sa spasyłkaj na advakata abvinavačanaha palityk adznačyŭ, što na nastupnym tydni sudovy praces moža zaviaršycca.
U dni suda nad Palčysam (14, 17—20 kastryčnika) aktyvisty roznych apazicyjnych arhanizacyj prychodzili da budynka suda z partretami błohiera i bieł-čyrvona-biełymi ściahami, kab vykazać padtrymku Palčysu. Supracoŭniki milicyi ličać akcyju niezakonnaj, składajučy na jaje ŭdzielnikaŭ pratakoły ab administracyjnym pravaparušeńni. 20 kastryčnika pratakoły składzienyja ŭ dačynieńni da Sieviarynca, Dźmitryja Daškieviča, Maksima Viniarskaha, Mikałaja Dziemidzienki, Uładzimira Jaromienka, Alesia Makajeva, Volhi Majoravaj, Siarhieja Palčeŭskaha, Volhi Nikałajčyk, Viktara Kułaka i Siarhieja Strybulskaha. Za piać dzion suda ŭ dačynieńni da aktyvistaŭ składziena ŭžo pryblizna 50 pratakołaŭ ab administracyjnych pravaparušeńniach. Aktyvisty majuć namier praciahnuć akcyju salidarnaści 24 kastryčnika.
Dvaccacipiacihadovy redaktar sajta 1863x.com Eduard Palčys, viadomy jak Džon Silvier, abvinavačvajecca ŭ raspalvańni varožaści pavodle prykmiety rasavaj, nacyjanalnaj, relihijnaj, moŭnaj ci inšaj sacyjalnaj prynaležnaści (č. 1 art. 130 KK), a taksama ŭ vyrabie i raspaŭsiudžvańni parnahrafičnych materyjałaŭ abo pradmietaŭ parnahrafičnaha charaktaru (art. 343 KK). U kancy žniŭnia ŭ sudzie Centralnaha rajona Minsku adbyŭsia hramadzianski praces ab pryznańni ekstremisckaj infarmacyjnaj pradukcyi, raźmieščanaj na sajcie 1863x.com. Hetyja słuchańni taksama prachodzili ŭ zakrytym režymie. Sajt 1863x.com byŭ stvorany pryblizna dva hady tamu. Na im publikavalisia palityčnyja teksty, niaredka z krytykaj uładaŭ Biełarusi i Rasii. Stvaralnik resursu vioŭ jaje na ŭmovach ananimnaści. Adzinym srodkam suviazi z redaktaram byŭ internet, z dapamohaj jakoha jon mieŭ znosiny z aŭtarami i davaŭ intervju. Pradstaŭniki demakratyčnych sił i pravaabaroncy Biełarusi ličać kryminalnuju spravu błohiera palityčnaj.
5 kastryčnika šeść biełaruskich arhanizacyj, uklučajučy Biełaruskuju asacyjacyju žurnalistaŭ, vystupili z sumiesnaj zajavaj, u jakoj pryznali Palčysa palityčnym viaźniem. Pavodle ich acenki, publikacyi, za jakija sudziać Palčysa, źjaŭlajucca «nie bolš čym aŭtarskim mierkavańniem aŭtara adnosna šerahu histaryčnych padziej i faktaŭ» i «nie ŭtrymlivajuć dokazaŭ raspalvańnia vajny, hvałtu abo nianaviści, nie ŭjaŭlajuć pahrozy dla nacyjanalnaj biaśpieki, hramadskaha paradku abo zdaroŭja i maralnaści hramadstva».
Kamientary