Navukoŭcy vyśvietlili: hałoŭny srodak ad prastudy chavajecca ŭ nosie

Z nadychodam zimy kolkaść reśpiratornych infiekcyj rezka ŭzrastaje. Asablivaje miesca siarod ich zajmajuć rynavirusy — samaja raspaŭsiudžanaja pryčyna zvyčajnaj prastudy, «vostraha reśpiratornaha zachvorvańnia». Adnak navat pry traplańni virusa ŭ arhanizm čałaviek nie zaŭsiody zachvorvaje. The Wall Street Journal źviartaje ŭvahu na novaje daśledavańnie navukoŭcaŭ ź Jelskaj škoły miedycyny, vyniki jakoha dapamahajuć zrazumieć, čamu tak adbyvajecca.

Jak adznačajuć aŭtary artykuła, apublikavanaha ŭ časopisie Cell Press Blue, tolki kala pałovy ludziej, u čyj nos trapiŭ virus, adčuvajuć simptomy prastudy. Vyrašalnuju rolu ŭ tym, ci zachvareje čałaviek, adyhryvaje imunnaja reakcyja kletak pazuch nosa. Mienavita tam razhortvajecca pieršaja i najvažniejšaja faza baraćby arhanizma ź virusam.

Kab razabracca ŭ pryčynach takoj roźnicy, kamanda navukoŭcaŭ vyraściła nasavuju tkanku ŭ łabaratoryi, što dazvoliła im vyvučać kletačnyja i malekularnyja źmieny ŭ abałoncy nosa i lohkich, kali hetyja kletki padviarhajucca ŭździejańniu rynavirusa.

Dva scenary raźvićcia padziej

U vyniku ekśpierymientaŭ navukoŭcy vyjavili, što reakcyja arhanizma zvyčajna idzie pa adnym z dvuch scenaroŭ.

Pry spryjalnym raźvićci padziej arhanizm dziejničaje na apiaredžańnie i imhnienna vypracoŭvaje śpiecyjalny białok — interfieron. Heta rečyva źjaŭlajecca hałoŭnym kaardynataram antyvirusnaj abarony. Jano błakuje praniknieńnie virusa ŭ kletki i spyniaje jaho razmnažeńnie. Kali interfieronu dastatkova i jon pačynaje dziejničać chutka, virus nie paśpieje zachapić navat adnaho pracenta kletak, dziakujučy čamu čałaviek zastajecca zdarovym i navat nie zdahadvajecca pra ataku.

Kali ž navukoŭcy błakavali dziejańnie interfieronu, virus pačynaŭ značna chutčej raspaŭsiudžvacca i aktyŭna kapijavać siabie.

Kali interfieronavy adkaz zapaźniajecca abo akazvajecca słabym, virus zachoplivaje značnuju častku tkanak. U takim vypadku zaražanymi stanoviacca 30% kletak abo bolš. Heta vyklikaje mocnuju zapalenčuju reakcyju: arhanizm pačynaje vypracoŭvać białki, jakija zapuskajuć zapaleńnie, uzmacniajecca vypracoŭka ślizi, źjaŭlajucca nasmark, zakładzienaść nosa, słabaść i inšyja typovyja simptomy prastudy.

Pavialičyć

Što ŭpłyvaje na imunny adkaz

Choć daśledčyki pakul nie mohuć dakładna skazać, što mienavita ŭ kožnym asobnym vypadku vyznačaje pośpiech imunnaha adkazu, jany vyłučyli šerah faktaraŭ, jakija surjozna ŭpłyvajuć na hety praces.

Adnym z hałoŭnych vorahaŭ zdaroŭja akazałasia chałodnaje pavietra. Pry panižeńni tempieratury navakolnaha asiarodździa kletki nosa i lohkich pačynajuć vypracoŭvać interfieron značna pavolniej, što daje virusu pieravahu.

Akramia klimatyčnych umoŭ, vialikuju rolu adyhryvaje navakolnaje asiarodździe i ład žyćcia. Udychańnie zabrudžanaha pavietra abo tytuniovaha dymu karennym čynam źmianiaje imunny adkaz. Zamiest chutkaj antyvirusnaj abarony arhanizm kurca abo žychara pramysłovaha rajona čaściej schilajecca da ciažkaha zapalenčaha pracesu, što robić prastudu bolš balučaj i praciahłaj.

Razam z tym, navukoŭcy zaŭvažyli i cikavy stanoŭčy faktar: kali čałaviek zusim niadaŭna pieranios inšuju virusnuju infiekcyju, uzrovień interfieronu zastajecca pavyšanym, što dazvalaje arhanizmu adbić novuju ataku rynavirusa jašče da źjaŭleńnia pieršych simptomaŭ.

• 15
• 0
• 0
• 0
• 0
• 1
• 0
• 0