Za adzin dzień na darohach Hrodzienskaj vobłaści źbili troch piešachodaŭ: adzin čałaviek zahinuŭ i jašče dva surjozna paciarpieli. Pra heta paviedamili va ŭpraŭleńni DAI UUS abłvykankama.
U Smarhonskim rajonie šukajuć kiroŭcu, jaki ŭciok ź miesca DTZ. Nieviadomy aŭtamabil, jak miarkujecca, hruzavy, 4 listapada ŭ pačatku vośmaj viečara na 1-m km darohi Smarhoń — Dzieviatni — Žodziški źbiŭ naśmierć piensijanierku. Žančyna išła pa abočynie darohi, na jaje sumcy byŭ śviatłoadbivalny elemient.
«Prośba ŭsich, chto vałodaje luboj infarmacyjaj pra abstaviny hetaha najezdu, kiroŭcu, jaki ździejśniŭ jaho, albo mašynu, jakoj jon kiravaŭ, patelefanavać u Dziaržaŭtainśpiekcyju pa telefonie ŭ Hrodnie 8 (0152) 79-75-05 abo 102», — adznačyli ŭ DAI rehijonu.
Jašče dva piešachody paciarpieli paśla najezdaŭ aŭtamabilaŭ u Słonimie. Kala kramy pa vulicy Zornaj kiroŭca, ruchajučysia zadnim chodam, nie zaŭvažyŭ piensijanierku. Žančynu ź pierałomam ściahna špitalizavali. U DAI adznačyli, što vinavaty ŭ avaryi 70 razoŭ pryciahvaŭsia da adkaznaści za parušeńni praviłaŭ.
Kala rynku na vulicy Tapolevaj pad kołami aŭtamabila apynułasia jašče adna žančyna. Jana išła pa piešachodnym pierachodzie, abstalavanym štučnymi niaroŭnaściami, adnak najezdu nie ŭdałosia paźbiehnuć. Ź pierałomam nahi i ŭdaram plača jana była špitalizavanaja.
U nastupnyja dvoje sutak prahnazujecca paharšeńnie ŭmoŭ nadvorja. Čakajucca praciahłyja apadki, miescami mocnyja, uzmacnieńnie vietru, na darohach hałalodzica, pierapady tempieratury. U DAI zaklikajuć kiroŭcaŭ być vielmi aściarožnymi, vybirać chutkaści z ulikam stanu darohi i bačnaści, admovicca ad rezkich manieŭraŭ.
Kamientary