U Słucku praviali šeście da hadaviny Słuckaha zbrojnaha čynu FOTA
26 listapada aktyvisty partyi BNF, Maładoha frontu, hramadzkaha ruchu «Za svabodu» i Ruchu salidarnaści «Razam» praviali na Słuččynie mierapryjemstvy z nahody 96 hadaviny Słuckaha zbrojnaha čynu.
U listapadzie—śniežni 1920 hoda vajskovyja častki, sfarmavanyja z žycharoŭ Słuckaha, Kapylskaha rajonaŭ i prylehłych rajonaŭ akazali ŭparty supraciŭ Čyrvonaj Armii, jakaja prasoŭvała ŭładu balšavickaj Rasiei na Biełaruś. Napiaredadni słuččaki prysiahnuli na viernaść Biełaruskaj narodnaj respublicy i mužna za jaje zmahalisia, ale ŭtrymać uładu BNR na hetych ziemlach bolš jak na miesiac im nie ŭdałosia.
Tema zmahańnia za niezaležnuju Biełaruś stała hałoŭnaj i na mitynhu, jaki adbyŭsia ŭ Słucku. Vystupoŭcy na akcyi kazali pra čarhovuju niebiaśpieku Biełarusi z boku Kramla, krytykavali biełaruski palityčny režym za zhortvańnie demakratyi i ŭzurpacyju ŭłady, zaklikali biełarusaŭ być hatovymi da adstojvańnia niezaležnaści krainy, u tym liku i sa zbrojaj u rukach.
Uračystyja akcyi na Dzień hierojaŭ — hetak aktyvisty nazyvajuć 26 listapada, kali pačaŭsia Słucki zbrojny čyn — adbylisia taksama na miescach bajoŭ u miastečkach Hrozaŭ, Siemiežaŭ i vioscy Čyrvonaja Słabada. Tam byli ŭskładzienyja kvietki da pamiatnych kryžoŭ. Pamiać vajaroŭ za niezaležnaść Biełarusi ŭšanavali chvilinaj maŭčańnia, byli praviedzienyja maleńni. Pabyvaŭšy ŭ hetych pamiatnych miaścinach, aktyvisty vyrašyli da nastupnych uhodkaŭ adramantavać memaryjalnyja kryžy.
Napiaredadni mitynhu aktyvisty «Maładoha frontu» pryniali prysiahu na addanaść arhanizacyi i Biełarusi. Padčas akcyi prachodziŭ zbor podpisaŭ za ŭstalavańnie ŭ Słucku pomniku ŭdzielnikam Słuckaha zbrojnaha čynu.
Historyja Słuckaha paŭstańnia zamoŭčvałasia ŭ savieckija časy, nie našmat bolš pra jaho viedajuć u Słucku i ciapier. Udzielniki akcyi asobna zhadvali imia historyka Anatola Hryckieviča, namahańniami jakoha pra Słucki zbrojny čyn stała šyroka viadoma ŭ kancy 1990-ych hadoŭ.
Taksama ŭdzielniki mitynhu ŭ Słucku ŭskłali kvietki da pomniku Tarasu Šaŭčenku ŭ miascovym parku.
Kamientary