Bolš za tysiaču kirmašoŭ projdzie ŭ Biełarusi ŭ kaladnyja i navahodnija śviaty
U Biełarusi ŭ kaladnyja i navahodnija śviaty zapłanavana pravieści 1.040 kirmašoŭ, ź ich 55 — u Minsku. Pra heta 1 śniežnia na pres-kanfierencyi ŭ Minsku paviedamiła namieśnik ministra antymanapolnaha rehulavańnia i handlu Iryna Narkievič.
Pavodle jaje słoŭ, projdzie 17.180 mierapryjemstvaŭ, «nakiravanych na stymulavańnie popytu (vystavy-prodažy, akcyi pa źnižeńni cany tavaru, rekłamnyja akcyi z dehustacyjaj i padarunkami)». U 2015 hodzie, dla paraŭnańnia, było praviedziena 12.366 takich mierapryjemstvaŭ. «Jak vy bačycie, aktyŭnaść handlu ŭ pieradnavahodni pieryjad z hodu ŭ hod raście», — adznačyła Narkievič.
Zhodna z padlikami ministerstva, z 20 pa 31 śniežnia ŭ krainie buduć pracavać kala 1.080 jełačnych kirmašoŭ, u Minsku — zvyš 200. U prodažy buduć naturalnyja jełki i chvoi vyšynioj ad 1 da 3 mietraŭ, a taksama navahodnija jełki ŭ kadkach, navahodnija bukiety. Narkievič nazvała i dyjapazon cen: vyšynioj da 1 mietra — 7-15 rubloŭ, ad 1 da 2 mietraŭ — 9-20 rubloŭ, ad 2 da 3 mietraŭ — 10-23 rubli, u kadkach — 20-100 rubloŭ.
Pavodle jaje infarmacyi, kandytarskimi pradpryjemstvami, jakija ŭvachodziać u kancern «Biełdziaržcharčpram», zapłanavana vyrabić i pastavić u handal kala 2 młn štuk navahodnich padarunkaŭ. Jany buduć rasfasavanyja va ŭpakoŭku ad 300 h da 3 kh i buduć kaštavać ad 4 da 45 rubloŭ.
«Nie zastanucca pakupniki i biez šampanskaha i pienistych vin biełaruskaj i impartnaj vytvorčaści», — skazała Narkievič. Užo ŭ listapadzie pradadziena treć ad zapłanavanaha abjomu prodažu — 97 tys. dał pry płanie ŭ 310 tys. Košt takich vin ajčynnych vytvorcaŭ varjirujecca ad 4,99 da 12,09 rubloŭ, impartnych — ad 11 da 26 rubloŭ.
«U prodažy taksama pradstaŭleny šyroki vybar jołačnych upryhažeńniaŭ i štučnych jołak, suvieniraŭ, karnavalnych kaściumaŭ. Usio heta dazvolić u poŭnym abjomie zadavolić popyt nasielnictva ŭ pieradnavahodnija i navahodnija dni», — skazała Narkievič.
Jak adznačyŭ načalnik upraŭleńnia kantrolu spažyvieckaha rynku — handlovaj inśpiekcyi MARH Valarjan Biaspały, u pieradnavahodnija dni pravodzicca manitorynh pracy abjektaŭ handlu i hramadskaha charčavańnia, bytavoha absłuhoŭvańnia. Usiaho, pavodle jaho słoŭ, za 11 miesiacaŭ hetaha hoda pravierana 3 tys. abjektaŭ. «Napiaredadni Novaha hoda i Kaladaŭ my ŭ asnoŭnym budziem pravodzić kantrolnyja mierapryjemstvy ŭ formie manitorynhu. Ale heta nie značyć, što subjekty haspadarańnia pavinny rassłabicca, zakanadaŭstva pavinna vykonvacca. Pry manitorynhu, kali my budziem vyjaŭlać hrubyja parušeńni, budziem vymušanyja pryniać miery až da prypynieńnia dziejnaści. Ale heta budzie krajniaj mieraj, ja dumaju, što subjekty da hetaha davodzić nie buduć», — skazaŭ jon.
Čynoŭnik zaklikaŭ spažyŭcoŭ paviedamlać pra zaŭvažanyja parušeńni na telefon davieru ministerstva.
Kamientary