Alaksandr Rahožnik paviedamiŭ, što krainy damovilisia ab canie na haz, adnak kankretnyja ličby jon nie ahučyŭ. Temu zakranuli padčas intervju telekanału «Biełaruś 1».
Termin dziejańnia staroha kantrakta na pastaŭku rasijskaha hazu ŭ Biełaruś skončyŭsia 31 śniežnia 2025 hoda. Jašče ŭ pačatku listapada paviedamlałasia, što pieramovy Minska i Maskvy nakont cany na haz znachodziacca na zaviaršalnaj stadyi. A 30 śniežnia kiraŭnik «Hazprama» Alaksiej Miler sustreŭsia z namieśnikam premjer-ministra Biełarusi Viktaram Karankievičam i hienieralnym dyrektaram AAT «Hazprom transhaz Biełaruś» Uładzimiram Majoravym.
Adnak kankretyka pa vynikach sustrečy ahučana nie była.
— Byli dasiahnuty damoŭlenaści. Mahu skazać adno: jany nie horšyja za tyja ŭmovy, jakija dziejničali da 2026 hoda. Tamu niejkaha rezkaha rostu taryfaŭ, naturalna, nie čakajecca, — padzialiŭsia padrabiaznaściami ŭžo ŭ novym hodzie Alaksandr Rahožnik.
Jak raniej zajaŭlaŭ kiraŭnik Ministerstva enierhietyki Dzianis Maroz, pytańnie cany maje stratehičnaje značeńnie, pakolki kala 60% elektraenierhii ŭ našaj krainie vyrablajecca z hazu, a dola syraviny ŭ sabiekošcie takoj elektraenierhii dasiahaje 80%.
Z 2023 hoda Biełaruś kuplała haz u Rasii pa fiksavanaj canie 128,5 dalara ZŠA za tysiaču kubamietraŭ. Pry hetym za błakitnaje paliva my raźličvajemsia ŭ rasijskich rublach. Pavodle źviestak Jeŭrazijskaha banka raźvićcia, paśla 2026 hoda Biełaruś i Rasija płanavali źnizić canu na haz dla biełaruskaha rynku.
Ciapier čytajuć
Jak u halečy śpivałasia radnia Łukašenki? Małaviadomyja fakty48
Kamientary