Stała viadoma, kolki ludziej sioleta złavili pry niezakonnym vysiakańni jełak
Načalnik upraŭleńnia lasnoj haspadarki Ministerstva lasnoj haspadarki Biełarusi Alaksandr Uhryn na pres-kanfierencyi paviedamiŭ, kolki parušeńniaŭ, źviazanych ź niezakonnaj vysiečkaj navahodnich dreŭ, było zafiksavana ŭ śviatočny pieryjad.
Z 15 śniežnia pa 8 studzienia dziaržaŭnaja lasnaja achova pracavała va ŭzmocnienym režymie, kab nie dapuścić niezakonnych vysiečak. Siarod inšaha ładzilisia rejdy ŭ lasach — najpierš u chvojnych maładniakach, kala daroh, nasielenych punktaŭ i sadovych tavarystvaŭ, dzie ryzyka niezakonnaj vysiečki najbolšaja.
Dla vyjaŭleńnia parušeńniaŭ vykarystoŭvalisia srodki fota– i videafiksacyi — tak zvanyja fotapastki. U sistemie Minlashasa ich naličvajecca bolš za 2100.
Pa vynikach praviedzienych mierapryjemstvaŭ było arhanizavana bolš za 1700 palavych pravierak. Za hety čas ahledzieli kala 5600 transpartnych srodkaŭ, 1100 učastkaŭ narychtoŭki navahodnich dreŭ i amal 900 dazvolnych dakumientaŭ.
Usiaho złavili bolš za 160 parušalnikaŭ, ź ich 7 vypadkaŭ niezakonnaj vysiečki navahodnich dreŭ.
Alaksandr Uhryn nahadaŭ, što za niezakonnuju vysiečku abo paškodžańnie dreva-kustarnikavaj raślinnaści praduhledžana administracyjnaja adkaznaść. Štrafy składajuć:
- dla fizičnych asob — da 30 bazavych vieličyń;
- dla indyvidualnych pradprymalnikaŭ — da 200 bazavych vieličyń;
- dla jurydyčnych asob — da 300 bazavych vieličyń.
Akramia štrafu, parušalnikam daviadziecca kampiensavać škodu, naniesienuju navakolnamu asiarodździu, a taksama košt niezakonna narychtavanaj pradukcyi. Za kožnaje navahodniaje dreva praduhledžana apłata ŭ pamiery adnoj bazavaj vieličyni.
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary