Uviečary 12 maja na vulicy Mahiloŭskaj u Minsku «Sitraen» raptam vylecieŭ na tratuar, dzie źbiŭ dźviuch studentak. Adna ź ich zahinuła na miescy, druhaja pamierła ŭ balnicy. Kiroŭca zastaŭsia žyvy.
Paśla avaryi Viktara Kazłova, kiroŭcu, pakinuli na voli. Uskładniŭ spravu i fakt, što 50-hadovy mužčyna śćviardžaŭ, nibyta raptoŭna straciŭ prytomnaść padčas ruchu. Ale ž śledstva vyśvietliła, što strata prytomnaści była adnym ź simptomaŭ zachvorvańnia, ad jakoha pakutavaŭ Kazłoŭ. Pra takija prystupy mužčyna viedaŭ, adnak usio roŭna praciahvaŭ jeździć za styrnom.
Zhodna z vynikami aŭtatechničnaj ekśpiertyzy, u dzień trahiedyi jon ruchaŭsia z chutkaściu nie mienš za 80 km/h. U momant ruchu nastupiŭ čarhovy raptoŭny prystup zachvorvańnia — što i pryviało da DTZ i śmierci dźviuch studentak, 1995 i 1996 hoda naradžeńnia.
U vyniku mužčynu pradjavili abvinavačvańnie ŭ pryčynieni śmierci pa nieaściarožnaści. 9 listapada jaho ŭziali pad vartu. Kazłovu pahražaje da 5 hadoŭ źniavoleńnia.
13 śniežnia sud Kastryčnickaha rajona pačaŭ razhlad spravy.
Advakat Kazłova paprasiŭ zrabić pasiadžeńnie zakrytym — bo budzie abmiarkoŭvacca zachvorvańnie i psichafizičny stan abvinavačanaha, a heta «intymnyja temy». Prakuror nie pahadziŭsia, paciarpiełyja — svajaki zahinułych — taksama. U vyniku sud chadajnictva adchiliŭ.
Jašče adno chadajnictva advakata — ab źmienie miery strymańnia i vyzvaleńni Kazłova z-pad varty — sud adchiliŭ taksama. Darečy, i prakuror, i paciarpiełyja paprasili pakinuć abvinavačanaha pad vartaj.
«My chočam, kab jaho [Kazłova] pakarali pa spraviadlivaści. Kab sud vynies spraviadlivaje rašeńnie», — prakamientavali pasiadžeńnie dvoje maładych ludziej. Heta braty zahinułych dziaŭčat, jany prachodziać pa spravie ŭ jakaści paciarpiełych. Złości ci žadańnia adpomścić u ich niama. Ale pakarańnie pavinna być, ličać jany. «Jak sud vyrašyć, tak i budzie», — havorać mužčyny.
U Kazłova była hiemanhioma — puchlina ŭ sasudach, praź jakuju čas ad času ŭ jaho zdaralisia prystupy epilepsii. Adzin z takich i napatkaŭ jaho 12 maja padčas ruchu pa vulicy Mahiloŭskaj, zajaviŭ prakuror.
Sam Kazłoŭ zapeŭniŭ, što pra prystupy nie viedaŭ, tym bolš, što raniej prachodziŭ lačeńnie i navat pieranios apieracyju.
Svaju vinu jon nie pryznaŭ.
Ciapier čytajuć
«Uśviedamlaju, što mahu stać pieršaj biełaruskaj, jakaja naviedaje ŭsie krainy śvietu». Padarožnica ź Minska razmaŭlaje na 8 movach i maryć pražyć 200 hadoŭ99
Kamientary