«Jeŭraopt» małajcom. A maksimalisty chaj čakajuć usiebiełaruskaj moŭnaj revalucyi na śviatyja nikoli»
«Na pastaŭlenaje redakcyjaj pytańnie «heta prahresiŭnaja inicyjatyva ci dyskryminacyja?» daju adkaz — na maju dumku, heta prahresiŭnaja inicyjatyva, — piša ŭ svaim fejsbuku historyk Alaksandr Paškievič. — Kali jana, naturalna, nie abmiažujecca tolki šyldami, a na praktycy hetyja kasy ad inšych adroźnivacca ničym nie buduć (tak u nas niaredka byvaje).
Biełaruskamoŭnym hramadzianam, jakija, kali adkinuć zvyčajna abyjakavych da moŭnych pytańniaŭ prostych viaskoŭcaŭ, składajuć u našym hramadstvie zusim nievialikuju mienšaść, ci nie ŭpieršyniu ŭ historyi dajecca harantavanaja, a nie tolki patencyjna-vierahodnaja mahčymaść atrymać u bujnoj sietkavaj kramie absłuhoŭvańnie na svajoj movie. Za jaje nie treba budzie zmahacca, skandalić i tracić čas dy niervy na pošuki — prosta padyści ŭ kankretna vyznačanaje i lohkadastupnaje miesca dy atrymać hetuju pasłuhu.
Ci nie pra heta mienavita my hadami i dziesiacihodździami maryli? Chaj sabie navat jak tolki pra samy minimum taho, što pavinna być? Nu to i dziakuj Bohu — pieršy krok uładalnikami hipiermarkieta zrobleny, prytym jaŭna nie pa čynoŭnickaj kamandzie źvierchu, a pa dobraj achvocie. Za pieršym krokam ź ciaham času mohuć być i nastupnyja. A mohuć i nie być — asabliva kali my zaraz zamiest udziačnaści budziem inicyjataraŭ hetaha kroku hnieŭna dziaŭbści, napisaŭšy na svaich ściahach niekanstruktyŭny maksimaliscki łozunh «usio abo ničoha». Usio ž taki my vidavočna nie ŭ takoj sile, kab stavić kamuści ultymatumy — choć mo ŭ kaho i zakružyłasia hałava ad paŭfantomnaj «miakkaj biełarusizacyi».
Usialakija ž zhadki pra dyskryminacyju i navat aparteid — poŭnaje hłupstva. Jaŭna ž nichto nie budzie biełaruskamoŭnych pakupnikoŭ prymušać karystacca mienavita hetymi, i nijakimi inšymi kasami. Chočacca być jak usie — kali łaska, idzi na niepaznačanuju kasu i atrymaj absłuhoŭvańnie na movie, jakuju, jak toj kazaŭ, Boh pašle (z amal stopracentnaj vierahodnaściu pašle rasiejskuju). Vybar jość. I ja asabista, kali mianie zaniasie niejkim vietram u toj hipiermarkiet, zrablu hety vybar na karyść biełaruskaj movy - užo siońnia. A maksimalisty chaj čakajuć usiebiełaruskaj moŭnaj revalucyi na śviatyja nikoli».
Kamientary