«Vašyja draŭlanyja cerkvy musiać być u śpisie UNESCO», — architektar biełaruskaj carkvy ŭ Łondanie

Draŭlany chram vyhladaje tak, byccam jaho pieranieśli na poŭnač brytanskaj stalicy prosta ź biełaruskaj vioski. Budynak carkvy zaprajektavaŭ kitajski architektar Czyŭaj Rafael So, jaki zacikaviŭsia biełaruskim draŭlanym dojlidztvam, jeździŭ u Biełaruś i staŭ unijatam.

Draŭlanych relihijnych budynkaŭ u Londanie nie było z 1666 hodu — kali vialikaja častka horadu zhareła ŭ časie vialikaha pažaru. Da siońnia, kali ŭ brytanskaj stalicy pačała dziejničać unijackaja Carkva Śviatoha Kiryły Turaŭskaha i ŭsich śviatych zastupnikaŭ biełaruskaha narodu. Unutry źmiaścilisia kala siamidziesiaci čałaviek — bolšaść biełarusaŭ, ale nia tolki. Tamu nabaženstva aśviačeńnia carkvy viali na troch movach: biełaruskaj, ukrainskaj i anhielskaj.

Architektar Czyŭaj Rafael So jašče małym dziciom razam ź siamjoj pierajechaŭ u Hankonh. Paśla ŭniversytetu trapiŭ u Londan, i ciapier maje architekturnaje biuro Spheron Architects. Niadaŭna atrymaŭ uznaharodu Karaleŭskaha instytutu brytanskich architektaraŭ za prajekt biełaruskaj carkvy.

Pavialičyć

«Ja zacikaviŭsia biełaruskaj architekturaj, kali atrymaŭ zamovu na pabudovu hetaj carkvy. Dziela hetaha navat jeździŭ u Biełaruś, kab vyvučać miascovaje dojlidztva. Ja liču, što pra vašy draŭlanyja cerkvy mała viedajuć u śviecie, a jany musiać być prynamsi ŭ śpisie UNESCO», — kaža Czyŭaj Rafael So.

Jak apaviadaje Czyŭaj Rafael So, dla pabudovy carkvy ŭžyli samyja sučasnyja technalohii. Usio ekalahičnaje i pryjaznaje dla asiarodździa. Jość i admysłovaja darožka dla invalidnych vazkoŭ, a abahravańnie zroblenaje z dumkaju pra aščadžańnie enerhii.

«Atrymałasia vielmi prosta. Czyŭaj So žyŭ pobač z našym Maryjnym Domam. Jak čałaviek cikaŭny, jon niekali zajšoŭ paznajomicca. U vyniku pryniaŭ u nas chrost, i my vyrašyli pabudavać hetuju carkvu», — kaža ajciec Siarhiej Stasievič, jaki kiruje carkvoj u Londanie.

Jak apaviadaje ajciec Siarhiej, z pačatku isnavańnia Biełaruskaj katalickaj misii ŭ Londanie ŭ 1947 hodzie biełarusy malilisia ŭ Maryjnym domie, bo svajoj asobnaj carkvy tut nie było. Śviatar spadziajecca, što biełaruskaja ŭnijackaja carkva zdoleje źjadnać biełarusaŭ u stalicy Vialikaj Brytanii, jakich tut moža być navat da piaci tysiač.

«Kali jość budynak carkvy, to jość razumieńnie, što heta nia niešta časovaje, nie ŭ kahości ŭ haściach, a što heta sapraŭdy biełaruski dom, u jakim možna źbiracca i malicca, — ličyć Jarasłaŭ Kryvoj, prychadžanin carkvy i pradstaŭnik biełaruskaj dyjaspary ŭ Londanie. — Jak i paŭsiul za miažoj, biełarusy tut nia vielmi aktyŭnyja, ale spadziajemsia, što z paŭstańniem hetaj carkvy da nas pačnie chadzić bolš suajčyńnikaŭ».

Zbudavanuju na tryccatyja ŭhodki čarnobylskaj katastrofy carkvu pryśviacili achviaram trahiedyi. Paśla liturhii ŭnučka Jakuba Kołasa Maryja Mickievič raskazała pra dziejnaść dabračynnaha fondu «Sakavik», jaki zajmajecca dapamohaju paciarpiełym ad avaryi.

Hł. taksama:

U Łondanie pačynajecca budaŭnictva biełaruskaj carkvy

Narožny kamień dla biełaruskaj carkvy ŭ Łondanie pryvieźli z Drui

• 0
• 0
• 0
• 0
• 0
• 0
• 0
• 0