Čarhovy raŭnd pieramoŭ ź Litvoj ab biaśpiecy BiełAES zapłanavany na pieršy kvartał
Čarhovy, treci pa liku, raŭnd pieramoŭ ź Litvoj ab biaśpiecy Biełaruskaj AES zapłanavany na pieršy kvartał hetaha hoda, paviedamiła 12 studzienia na pres-kanfierencyi ŭ Minsku pieršy namieśnik ministra pryrodnych resursaŭ i achovy navakolnaha asiarodździa Ija Małkina.
Adkazvajučy na pytańnie BiełaPAN, čynoŭnica adznačyła, što adnačasova iduć dva pierahavornyja pracesy ź Litvoj z nahody Biełaruskaj AES. Pieršy źviazany z abmierkavańniem prablemnych pytańniaŭ budaŭnictva, druhi — z abmierkavańniem prajekta biełaruska-litoŭskaha pahadnieńnia zhodna z Kanviencyjaj Espaa ŭ častcy acenki ŭździejańnia stancyi na navakolnaje asiarodździe ŭ tranśmiežavym kantekście paśla ŭviadzieńnia AES u ekspłuatacyju.
«Što da druhoha, to ŭ nas prajšli dva raundy, i treciaja sustreča była zapłanavanaja na studzień 2017 hoda (raniej paviedamlałasia pra kaniec kastryčnika 2016 hoda). Što da pieršaha, to taksama prajšli dva raŭndy pieramoŭ, treci my zapłanavali na pieršy kvartał 2017 hoda. Ja nie vyklučaju, što hetyja dva pracesy abjadnajucca ŭ adzin, — skazała Małkina. — Abmiarkoŭvajecca placoŭka dla pieramoŭ — horad Vilnius. My sustrakajemsia na pryncypach ratacyi».
Pieršy namieśnik ministra paviedamiła, što ŭ pačatku studzienia 2017 hoda Minsk nakiravaŭ list pra hatoŭnaść «pryniać najbolš zručnuju dla Litvy datu, kab sustrecca dla abmierkavańnia pytańniaŭ, što znachodziacca ŭ zonie pavyšanaj uvahi».
Kažučy pra ekałahičny aśpiekt pracy Biełaruskaj AES, Małkina adznačyła: «Nieadnarazova hučała ŭ ŚMI, i pra heta nie raz havaryła i ja. Razumiejučy, što takoje pytańnie važnaje dziaržorhanam dla pryniaćcia niejkich rašeńniaŭ, u 2015 hodzie ŭ miežach ekśpiertaŭ Jeŭrapiejskaj ekanamičnaj kamisii prasili zrabić dadatkovuju acenku nastupstvaŭ uvodu ŭ ekspłuatacyju Biełaruskaj AES. Ekśpierty zrabili adnaznačnuju vysnovu: uviadzieńnie atamnaj stancyi skarocić vykid da 10 młn ton parnikovych hazaŭ štohod. Siońnia ŭ Biełarusi takija vykidy składajuć 91-92 młn ton štohod. Heta značyć pryblizna adna dziasiataja budzie skaračeńnie».
«U pryncypie my nie kažam, što Biełaruskaja AES z punkta hledžańnia hłabalnaha ŭździejańnia na klimat — heta drenna i horš, čym adnaŭlanyja krynicy enierhii. My imkniemsia raźvivać roznyja napramki», — adznačyła Małkina.
Na druhim raŭndzie dvuchbakovych kansultacyj u Vilniusie ŭ vieraśni 2016 hoda biełaruskija i litoŭskija ekśpierty nie zmahli pieraadoleć roznahałośsi pa BiełAES. Byli ŭźniatyja pytańni, źviazanyja ź incydentami na budaŭnictvie stancyi, praviadzieńniem stres-testaŭ i SEED-misii ŭ Biełarusi, a taksama techničnyja pytańni prajekta Biełaruskaj AES i mahčymych ryzyk zabrudžvańnia raki Niarys (Vilija) i padziemnych vod Vilni.
Kamientary