U Hiermanii paprasili palityčnaha prytułku kala 40 vajskoŭcaŭ NATA z Turcyi, bolšaść ź ich majuć vysokija voinskija zvańni. Pra heta ŭ subotu, 28 studzienia, paviedamlaje Deutsche Welle sa spasyłkaj na štotydniovik Der Spiegel.
Türkische Nato-Offiziere. Der Spiegel.
«Biez usialakich sumnievaŭ, my nie možam adpravić hetych sałdat nazad u Turcyju. Jany tut ža apynucca ŭ turmie», — zajaviŭ vydańniu ŭnutrypalityčny ekśpiert frakcyi Chryścijanska-sacyjalnaha sajuza ŭ bundestahu Štefan Majer (Stephan Mayer).
U ministerstvie ŭnutranych spraŭ FRH i Fiederalnym viedamstvie pa spravach mihracyi i biežancaŭ padkreślivajuć, što prośby tureckich vajskoŭcaŭ razhladajucca ŭ ahulnym paradku, piša Der Spiegel. Na 2 lutaha namiečany vizit kanclera FRH Anhieły Mierkiel (Angela Merkel) u Ankaru, nahadvaje štotydniovik.
Vajskoŭcy admaŭlajuć dačynieńnie da putču
U śniežni 2016 hodu niekalki tureckich aficeraŭ, dysłakavanych na vajskovych bazach NATA, raspaviali DW, što atrymali zahad viarnucca na radzimu, ale majuć namier prasić u FRH i Bielhii palityčnaha prytułku. Pa ich słovach, Turcyja adpraviła ŭ svaje dyppradstaŭnictvy za miažoj 20 śpisaŭ vajskoŭcaŭ, jakija padazrajucca ŭ sprobie putču. Ankara zapatrabavała, kab vajskoŭcy zdali paśviedčańni NATA i dypłamatyčnyja pašparty, i na praciahu troch dzion viarnulisia na radzimu. Svaju datyčnaść da sproby dziaržaŭnaha pieravarotu tureckija vajskoŭcy NATA admaŭlajuć.
26 studzienia vyšejšy sud Hrecyi admoviŭsia vydać Ankary vosiem tureckich vajskoŭcaŭ, uciekačoŭ z Turcyi paśla lipieńskaha putču. U adkaz Turcyja prystrašyła skasavać pahadnieńnie ź ES pa biežancach. Dahavor pamiž Bruselem i Ankaroj praduhledžvaje, što ŭsie ŭciekačy, jakija nielehalna prybyli marskim šlacham da bierahoŭ Hrecyi, pavinny być adpraŭlenyja nazad u Turcyju. U adkaz ES abaviazaŭsia prymać u abmien na kožnaha nielehalnaha mihranta pa adnym lehalnym siryjskim biežancu z tureckaj terytoryi. Akramia taho, Brusel pahadziŭsia pieradać Ankary 6 młrd jeŭra na patreby biežancaŭ.
Kamientary