Šeryja lutaŭskija dni, na pieršy pohlad padajecca, mieli mała śvietłaha: šerah hučnych sudovych raźbiralnictvaŭ, budaŭnictva ŭ Kurapatach, rost cen na kamunalnyja. My ž pasprabavali razhledzieć siarod usiaho, što adbyłosia ź biełarusami ŭ lutym, toje, čamu varta ŭściešycca i čym varta hanarycca.
Domračava vyjhrała srebra ŭ honcy pieraśledu na ČS pa bijatłonie
Usiaho tolki praz čatyry miesiacy paśla naradžeńnia dački Darja Domračava nie prosta viarnułasia ŭ bijatłon, a adrazu ŭźniałasia na druhuju prystupku pjedestała na čempijanacie śvietu ŭ Chochfilcenie. Miedalnaja dla trochrazovaj alimipijskaj čempijonki honka pieraśledu stała adzinaj na spabornictvach biez adzinaha chibnaha strełu. Uzornaja stralba i pa-raniejšamu chutki bieh pa trasie dazvolili Domračavaj ździejśnić nievierahodny kambek: na druhuju pazicyju jana vybrałasia z ažno 27-ha (!) miesca, zaniataha pa vynikach spryntu.
Biełaruski Svabodny teatr uhanaravany mižnarodnaj premijaj
Fienamienalnaja źjava ŭ sučasnym biełaruskim mastactvie — teatr, pra śpiektakli jakoha pišuć najbujniejšyja suśvietnyja vydańni, kštałtu The New York Times, The Guardian abo The Financial Times, i adnačasova maŭčać na radzimie. Adzin tolki fakt taho, što letaś na pačatku vosieni «Svabodny teatr» staviŭ svaju novuju pracu Burning Doors na scenie łondanskaha Soho Theatre, varty asablivaha honaru. Pastanoŭka nie zastałasia pa-za ŭvahaj krytykaŭ: dniami «svabodaŭcy» atrymali prestyžnuju teatralnuju premiju The Offies'2017 (The Off West End Theatre Awards 2017) u naminacyi «Lepšy ansambl». Adznačyli «Svabodny teatr» i pa toj bok akijana. Teatralny ahladalnik vydańnia Chicago Tribune ŭklučyŭ śpiektakl «Karol Lir», syhrany na biełaruskaj movie (!), va ŭłasny top-10 hałoŭnych padziej teatralnaha žyćcia Čykaha ŭ 2016 hodzie.
Biełaruskija tenisistki abyhrali Hałandyju i vyjšli ŭ paŭfinał Suśvietnaj hrupy
Žanočy Kubak Fiederacyi — anałah mužčynskaha Kubku Devisa, u jakim u 2004-m hrymnuła biełaruskaja zbornaja. Praz trynaccać hadoŭ upieršyniu ŭ historyi šlach u paŭfinał prestyžnaha turniru prakłała sabie ŭžo žanočaja zbornaja Biełarusi, abyhraŭšy doma niderłandak. Da taho ž biez hałoŭnaj zorki — Viktoryi Azaranki, jakaja haduje dvuchmiesiačnaha syna.
Kuoll i FriendlyData — inviestycyi ŭ biełaruskija IT-startapy
Biełaruskija IT-raspracoŭščyki praciahvajuć źbirać inviestycyi ŭ jakaści dapamohi dla startu pierśpiektyŭnych na dumku ekśpiertaŭ prajektaŭ.
Hetak startap Kuoll, jaki stvaraje siervis dla raspracoŭščykaŭ pa kantrolu za pamyłkami ŭ veb-dadatkach, trapiŭ u treci nabor ńju-jorkskaha Starta Accelerator i atrymaŭ $130 tysiač na svajo raźvićcio. Inšy prajekt maładych IT-śpiecylistaŭ FriendlyData pieršym ź Biełarusi trapiŭ u adzin ź lepšych aksielerataraŭ (sacyjalny instytut padtrymki startapaŭ) śvietu — kalifarnijski 500 Startups, u vyniku čaho maje $150 tysiač inviestycyj.
Anton Kušnir treci raz u siezonie pieramoh na etapie Kubka śvietu
Alimpijski čempijon Anton Kušnir praciahvaje dakazvać, što na dadzieny momant jamu niama roŭnych. Treciuju pieramohu ŭ siezonie biełaruski frystajlist zdabyŭ u paŭdniovakarejskim Bakvanie. Na žal, etap Kubka śvietu ŭ Raŭbičach spartsmien prapuskaŭ.
Čytajcie taksama:
8 biełaruskich pośpiechaŭ studzienia
-
Režym Łukašenki časova stanie mienš ahresiŭnym da susiedziaŭ, ale stratehična budzie imknucca da avałodańnia atamnaj zbrojaj
-
«Znajšli krajniaha», a «pastaviać sałdafona jakoha-niebudź». U sacsietkach adreahavali na zvalnieńnie kiraŭnika «Minsktransa»
-
Cyhankoŭ: Nie padazravaŭ, što Babaryka źjaŭlajecca prychilnikam sacyjalizmu — mary siaredniaha čałavieka
Ciapier čytajuć
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii3
Kamientary