Na źmienu hłabalnym intehracyjnym pracesam prychodzić uśviedamleńnie pieršasnaści nacyjanalnych intaresaŭ, zajaviŭ Alaksandr Łukašenka na naradzie ab aktualnych pytańniach raźvićcia krainy.
«Usie vyraźniej vyjaŭlajucca novyja tendencyi ŭ mnohich krainach, pačynajučy z ZŠA i Jeŭropy. Ich sutnaść zaklučajecca ŭ tym, što na źmienu hłabalnym intehracyjnym pracesam prychodzić uśviedamleńnie pieršasnaści nacyjanalnych intaresaŭ. Kali pa-narodnamu kazać, śviet nacyjanalizujecca», — cytuje Łukašenku jaho pres-słužba.
Pa słovach kiraŭnika dziaržavy, u ekanamičnaj śfiery heta vyjaŭlajecca ŭ imknieńni abaranić unutranyja rynki, raźvivać vytvorčaść na svaich terytoryjach, abmiažoŭvajučy dostup kankurentam. U palitycy, adznačyŭ jon, uvaha bolš kancentrujecca na ŭnutranych prablemach, jakija nabyvajuć usio bolšuju vastryniu i napružanaść, pra što śviedčyć ŭsplosk pratestnych nastrojaŭ u hramadstvie i rost papularnaści pravych partyj i palitykaŭ.
«Vy bačycie, što adbyvajecca ŭ Hiermanii, asabliva reljefna heta vykazana ŭ Francyi napiaredadni prezidenckich vybaraŭ», — pryvioŭ prykłady Łukašenka.
«Biełaruś — kraina adkrytaja, ekspartna aryjentavanaja. Tamu nam treba ŭličvać novyja tendencyi i apieratyŭna na ich reahavać», — skazaŭ jon.
Łukašenka kanstatavaŭ, što prahladajucca jak stanoŭčyja, tak i niehatyŭnyja aśpiekty. «U cełym aryjentacyja na pryjarytetnaść nacyjanalnych intaresaŭ adpaviadaje i našym pamknieńniam — heta fakt. Tut my idziom u rečyščy suśvietnych tendencyj», — praciahnuŭ jon.
«Adnak niehatyŭny bok takoha pracesu zaklučajecca ŭ tym, što ciapier surjozna paharšajucca mahčymaści vychadu našaj pradukcyi i pasłuh na rynki inšych krain, jakija ŭvodziać usio novyja barjery. I što naściarožvaje, našy siabroŭskija, blizkija, rodnyja krainy hetym taksama nie hrebujuć. Tamu nam treba znachodzić šlachi pieraadoleńnia hetych pieraškod, maksimalna zachoŭvajučy tradycyjnyja handlova-ekanamičnyja suviazi, šukać novyja nišy dla biełaruskaha ekspartu», — zajaviŭ kiraŭnik Biełarusi.
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj89
Kamientary