Źbiehłych z doma viciebskich padletkaŭ praz tydzień znajšli ŭ rasijskim Chabaraŭsku. Pra heta TUT.BY paviedamiła aficyjny pradstaŭnik USK Śviatłana Sacharava.
«Dziakujučy infarmacyi, jakuju nakiravali ŭ MUS Rasii, supracoŭniki transpartnaj palicyi źniali ź ciahnika troch dziaciej u Chabaraŭsku. Za imi vylecieli baćki. Śledčyja praciahvajuć pracu pa kryminalnaj spravie», - adznačyła Śviatłana Sacharava.
Kryminalnuju spravu pa fakcie źniknieńnia traich padletkaŭ ź Viciebska. haradski adździeł Śledčaha kamiteta raspačaŭ 11 sakavika.
7 sakavika ŭ Kastryčnicki RAUS Viciebska z zajavaj ab źniknieńni dziaciej źviarnułasia ich maci. Jana paviedamiła, što kala 7.30 u hety dzień 18-hadovy Rusłan, 16-hadovy Cimur i 15-hadovaja Kaciaryna pajšli ŭ škołu. Adnak tam jany nie źjavilisia i dadomu nie viarnulisia.
Śledčyja vyśvietlili, što vučni 9-ha i 11-ha kłasaŭ nakiravalisia ŭ viciebski rajon Bileva. Adtul chłopcy, jak miarkujecca, na paputkach dajechali da Lozna. U haradskim pasiołku ich zafiksavali kamiery videanazirańnia, kali dzieci kuplali ježu. Zatym, imavierna, braty i siastra nakiravalisia ŭ Smalensk.
Pierad sychodam z domu dzieci pakinuli zapisku, uziali svaje pašparty i hrošy ź siamiejnaha biudžetu. Śledčyja ahledzieli dom, dzie žyvuć dzieci, kanfiskavali zapisku i ich fatahrafii.
Biełaruskim pravaachoŭnikam dapamahali rasijskija kalehi.
U siamji Dzivinych hadujecca 8 dziaciej, starejšy syn užo žyvie samastojna, znachodziačysia na vučobie ŭ ZŠA. Pryčynaj sychodu dziaciej, na dumku baćki Rusłana Dzivina, mahło stać toje, što jany spałochalisia pakarańnia za pravinu. Hałava siamji daviedaŭsia, što ŭ adsutnaść baćkoŭ chłopcy pasprabavali cyharety i ałkahol, i paviedamiŭ im, što pa pryjeździe dadomu surjozna pahavoryć ź imi. Paśla hetaha troje starejšych dziaciej prapali.
Kamientary