«Anderlecht» — BATE — 1:2. Pra takija sustrečy jość šablonnaja źbitaja fraza: «Hulnia padabajecca hledačam, ale davodzić da infarktaŭ treneraŭ».
«Anderlecht» — BATE — 1:2
Užo sama mahčymaść paspaborničać z takim słavutym klubam, jak bruselski «Anderlecht» usprymałasia dla BATE ŭdačaj. Nu a pieramahčy takoha supiernika, dy jašče na čužym poli, darahoha kaštuje.
Pra takija sustrečy jość šablonnaja źbitaja fraza: «Hulnia padabajecca hledačam, ale davodzić da infarktaŭ treneraŭ». Tak było i ŭ Bruseli.
Na dziva mnohich, kamanda z Barysava nie akapałasia kala svaich bramaŭ, a sprabavała adkazać na kožny vypad haspadaroŭ svaim kołkim udaram. Čaho tolki varty ŭdar z padkrutkaj u dalokuju dzieviatku Vitala Radzivonava, ale krychu mima. Dziela spraviadlivaści skažam, što niekalki razoŭ miač prosta cudam nie traplaŭ u bramu Siarhieja Viaromki. Navat kali pradstaŭniki bruselskaha internacyjanału bili va ŭpor.
Pieršy tajm tak i skončyŭsia nulami, ale hledačy nie sumavali zusim. A na 66-aj chvilinie Hijom Žyjie prosta rasstralaŭ biełaruskija varoty. Zdavałasia b, klas belhijcaŭ narešcie prajaviŭsia, i kamanda ŭpeŭniena daviadzie hulniu da pieramohi.
BATE z hetym było kardynalna niazhodnym. Užo ŭ pieršaj ža atacy ŭ adkaz 20-hadovy dublor Niachajčyk prymusiŭ u sfalić palaka Marcina Vasileŭskaha ŭ svajoj štrafnoj. Makiedonski arbitar vydaliŭ abaroncu «Anderlechta» i pryznačyŭ penalci. Siarhiej Kryviec spraviŭsia z nervami – 1:1.
Emocyi zaškalvali nia tolki na poli, ale i pa-za im. Usiaho praź niekalki chvilinaŭ čyrvonuju kartku ŭbačyŭ pierad saboj Ihar Stasievič, jaki na toj momant užo byŭ zamienieny.
I ŭsio ž BATE vyrvała pieramohu. Bliskučaja ataka biełarusaŭ na 88-aj chvilinie skončyłasia bliskučym pasam Sivakova na najlepšaha hulca hulni Niachajčyka. Pavał akuratna ŭdaryŭ i, da ździŭleńnia zapoŭnienaha stadyjonu, patrapiŭ – 1:2.
Užo ŭ dadanyja arbitram chviliny barysaŭcam znoŭ uśmichnułasia ŭdača. Paśla vystrału va ŭpor marakanca Busufu miač patrapiŭ u fartovaha Viaromku. Zdajecca, što belhijskija balelščyki tak i nie zrazumieli, što adbyłosia.
Pryjemna, što naša kamanda pakazała hulniu eŭrapiejskaha ŭzroŭniu. Užo nia pieršy hod mienavita barysaŭcy źjaŭlajucca adzinaj addušynaj biełaruskich zaŭziataraŭ na eŭrapiejskaj arenie.
Matč u adkaz projdzie praz tydzień na barysaŭskim haradzkim stadyjonie. Zdajecca, što anšlah užo zabiaśpiečany.
Ciapier čytajuć
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj93
Kamientary