Źbityja na Dzień Voli: pravaabaronca Alaksiej Łojka špitalizavany, milicyja prosić zabrać zajavu
25 sakavika zranku juryst Alaksiej Łojka prachodziŭ treninh pa nazirańni za mirnaj demanstracyjaj na Dzień Voli. Sustreča prachodziła na ofisie Pravaabarončaha centra «Viasna». Kala 13-j, za hadzinu da zbora na mitynh, pačaŭsia šturm ofisa. Paśla zatrymańnia aktyvist byŭ dastaŭleny ŭ špital chutkaj dapamohi z čerapna-mazhavoj traŭmaj.
«Mnie nie paščaściła stajać kala dźviarej, kali ich vybili», — skazaŭ naziralnik. Łojka atrymaŭ niekalki ŭdaraŭ pa korpusie, paśla čaho jaho vyciahnuli z kvatery, pavalili na padłohu, nanieśli ŭdar nahoj pa hałavie i niekalki chvilin trymali botam hałavu na padłozie. Ja nie adrazu zrazumieŭ, što adbyvałasia i nie ŭciamiŭ, chto ŭvarvaŭsia ŭ ofis, bo ludzi byli ŭ cyvilnaj vopratcy. Kožnaje svajo dziejańnie jany supravadžali maciukami. Padumaŭ — «bandyty», nie inakš», — uzhadvaje juryst Alaksiej Łojka.
Na bietonnaj padłozie padjezda Łojka pralažaŭ kala siami chvilin, paśla čaho chłopca zaviali ŭ pamiaškańnie, u jakim jaho, jak i inšych haściej ofisa, pastavili tvaram da ściany. Usim zahadali pakłaści ruki na ścianu.
«Ja tak doŭha nie moh stajać, bo ruka zaciakła paśla ložki na bietonnaj padłozie. Apuściŭ ruku i atrymaŭ u toj ža momant udar pa nyrkach. Ščyra, mnie tak baleła hałava, što nie adrazu zrazumieŭ, što adbyvałasia. Tolki ŭ špitali lekary zafiksavali hiematomu ŭ toj vobłaści» — dadaŭ Łojka.
Kala 50 čałaviek, jakija znachodzilisia na ofisie PC «Viasna», byli dastaŭlenyja ŭ Pieršamajski RUUS, u tym liku zamiežnyja žurnalisty. Paśla niekalkich hadzin u milicyi zatrymanyja byli adpuščanyja. Juryst pačuvaŭsia błaha. Na ščaście, pobač z budynkam Pieršamajskaha RUUS znachodziłasia karetka chutkaj dapamohi, jakaja dastaviła Łojku ŭ špital chutkaj dapamohi.
U špitali naziralniku pastavili dyjahnaz «strasieńnie mozha lohkaj stupieni» i zafiksavali šmatlikija paškodžańni miakkich tkanak. Tam ža Łojka aformiŭ zvarot u prakuraturu pa fakcie źbićcia i niepravamocnych dziejańniaŭ supracoŭnikaŭ pravaachoŭnych vorhanaŭ.
«Uviečary mnie telefanavaŭ supracoŭnik prakuratury i prasiŭ zabrać zajavu. Skazaŭ, što dobra, što ceły, što vyjšła nieparazumieńnie. Niachiłaje nieparazumieńnie z pabitaj hałavoj i nyrkami. Kolki razoŭ naziraŭ za akcyjami i nikoli takoha nie bačyŭ», — dadaŭ paciarpieły.
Ahułam, pavodle dadzienych PC «Viasna», za 25 sakavika było zatrymana zvyš za 700 čałaviek.
Ciapier čytajuć
Biełaruska adnačasova mieła dva hramadzianstvy — ale daviedałasia pra heta tolki ŭ 21 hod. Jak tak vyjšła?1
Kamientary