Narviehija vyjhrała miedalny zalik Alimpijady. Stolki zołata nie było jašče nikoli

Siońnia apošni dzień Alimpijady, buduć razyhranyja jašče niekalki kamplektaŭ uznaharod, ale Narviehiju ŭžo nie dahnać.

Na jaje rachunku 40 uznaharodaŭ, u tym liku 18 załatych, pa 11 siarebranych i bronzavych.

Narviežcy nie prosta daterminova harantavali sabie pieršaje miesca, ale i sabrali rekordnuju kalekcyju załatych uznaharod. Usiaho ŭ skandynaŭskich atletaŭ ažno 18 pieramoh!

Stolki raniej nie mieŭ nichto i nikoli. Papiaredni rekord, darečy, taksama naležaŭ narviežcam: u Piekinie-2022 u ich było 16 załatych.

Šeść załatych uznaharod vyjhraŭ narviežski łyžnik Jochanies Kłeba, pryčym čatyry ŭ indyvidualnych spabornictvach. Kłeba na hetaj Alimpijadzie vyjhraŭ usio zołata ŭ mužčynskich łyžnych dyscyplinach.

Na druhim radku z 11 załatymi pieramohami raźmiaściłasia zbornaja ZŠA. Siońnia amierykancy mohuć vyjhrać zołata ŭ mužčynskim chakiejnym turniry, kali ŭ finale abyhrajuć Kanadu (pačatak matča a 16:10 pa Minsku).

U Niderłandaŭ i Italii pa 10 załatych pieramoh. Čym admietnyja Niderłandy? Jany zavajavali 20 uznaharod (10 załatych, 7 siarebranych i try bronzavyja).

Pavialičyć

Biełaruś upieršyniu z 1994 hoda, kali stała vystupać asobnaj kamandaj, nie zavajavała na Zimovaj Alimpijadzie nivodnaj uznaharody.

Praŭda, na hetych Hulniach z-za mižnarodnych banaŭ u šerahu dyscyplin, u tym liku miedalnym bijatłonie, udzieł brali tolki siem spartovak. Ale raniej pryvozili choć adnu ŭznaharodu, jak u 2002 ci 2006 hadach. U Sočy-2014 naohuł byŭ najlepšy vynik — šeść miedaloŭ (5 załatych i 1 bronzavy). U Piekinie-2022 było dva srebry.

Najlepšy vynik u Italii pakazali kańkabiežka Maryna Zujeva, jakaja zaniała 6‑ie miesca ŭ zabiehu na 5000 mietraŭ, i frystajlistka Hanna Huśkova z vośmym miescam u finale pa łyžnaj akrabatycy. 

Usiaho miedali na hetaj Alimpijadzie zavajavali pradstaŭniki 30 krain, u tym ź liku z byłoha SSSR Łatvija (srebra i bronza), Kazachstan (adno zołata), Estonija (srebra), Hruzija (srebra), Rasija (srebra).

Usiaho ŭdzieł u Hulniach biaruć 95 krain.

Siońnia na Alimpijadzie buduć razyhranyja miedali ŭ žanočaj łyžnaj honcy na 50 km, babślei, kiorlinhu, chafpajpie frystajła i finał chakiejnaha turniru ŭ mužčyn. 

Zakryćcio Alimpijady pačniecca ŭ 22:30 pa Minsku.

Nastupnyja Zimovyja Alimpijskija hulni projduć u lutym 2030 hoda ŭ francuzskich Alpach. Hetyja buduć čaćviortyja Zimovyja hulni ŭ Francyi pačynajučy z 1924 hoda.

• 4
• 0
• 2
• 2
• 0
• 0
• 0
• 0